हप्तामा दुई दिन छुट्टी पाएका कर्मचारीले महिनामा दुई पटक तलब पाउने

६ वैशाख, काठमाडौँ । नेपाल सरकारले सरकारी कर्मचारीहरूको तलब भुक्तानी प्रणालीमा परिवर्तन गर्ने निर्णय गरेको छ । अहिलेसम्म मासिक रूपमा हुँदै आएको तलब भुक्तानीलाई अर्धमासिक (महिनामा दुई पटक) गर्ने व्यवस्था मिलाउन अर्थमन्त्री स्वर्णीम वाग्लेले निर्णय गरी महालेखा नियन्त्रकको कार्यालयमा पत्राचार समेत भएको छ ।

अर्थ मन्त्रालयअन्तर्गत बजेट तथा कार्यक्रम महाशाखाका सहसचिव डा सुमन दाहालले महालेखा नियन्त्रक कार्यालयलाई पत्र पठाउँदै यस्तो व्यवस्था कार्यान्वयनका लागि आवश्यक तयारी गर्न निर्देशन दिनुभएको छ । पत्रमा उल्लेख भएअनुसार राष्ट्रसेवक कर्मचारीहरूको तलबभत्ता हाल मासिक रूपमा भुक्तानी हुँदै आएको भए पनि अब त्यसलाई अर्धमासिक रूपमा वितरण गर्ने गरी प्रणाली विकास गर्न भनिएको छ।

मन्त्रालयले २०८३ साल वैशाख ४ गते मन्त्रीस्तरको निर्णय अनुसार अर्धमासिक भुक्तानी प्रणाली लागू गर्ने निर्णय गरेको उल्लेख गरेको जनाएको छ । सोही निर्णय कार्यान्वयन गर्न आवश्यक प्राविधिक तथा प्रशासनिक तयारी मिलाउन महालेखा नियन्त्रक कार्यालयलाई अनुरोध गरिएको हो ।

यो व्यवस्था लागू भएमा सरकारी कर्मचारीहरूले प्रत्येक महिना दुई पटक तलब पाउनेछन्, जसले नगद प्रवाह व्यवस्थापनमा सहजता ल्याउने अपेक्षा गरिएको छ । साथै, कर्मचारीहरूको आर्थिक योजना र दैनिक खर्च व्यवस्थापनमा पनि सकारात्मक प्रभाव पर्ने विश्वास गरिएको छ । यसअघि सरकारले हप्तामा दुई दिन छुट्टी दिने निर्णय गरेको थियो । जस अनुसार अहिले पनि शनिबार र आइतबार बिदा भैरहेको छ ।