३ मंसिर २०८३, बुधबार | Wed Nov 18 2026

विष्णु पौडेल ठगीमा दोषी ठहर, ६ वर्ष कैद र १ करोड २६ लाख जरिवाना

https://www.muktinathbank.com.np/online/loan-application

२ मंसिर, पोखरा । इमेज बचत तथा ऋण सहकारी संस्थाको बचत रकम हिनामिना गरेको कसुरमा विष्णु पौडेल दोषी ठहर भएका छन् । कास्की जिल्ला अदालतले पौडेललाई ६ वर्ष कैद र १ करोड २६ लाख २३ हजार रुपैयाँ जरिवाना हुने फैसला गरेको छ ।

न्यायाधीश चन्द्रप्रकाश तिवारीको इजलासले गत १७ कात्तिकमा गरेको फैसलामा पौडेलसहित सात जनालाई सहकारी ठगीमा दोषी ठहर गर्दै कैद, जरिवाना र बिगो असुलको आदेश दिएको हो । अदालतका सूचना अधिकारी रामबहादुर किसानका अनुसार पौडेललाई अन्य तीन अभियुक्त निशा कार्की, भूमि भण्डारी र विमला गुरुङसँगै जनही ६ वर्ष कैद र समान १ करोड २६ लाख २३ हजार रुपैयाँ जरिवाना तोकिएको छ ।

फैसलाअनुसार पौडेलसहित सात जनाबाट १८ करोड ९६ लाख ५९ हजार रुपैयाँ बिगोसमेत भराउनुपर्नेछ । फैसलाको पूर्णपाठ भने तयार भइसकेको छैन । पूर्णपाठ आएपछि बिगो असुली, सहकारीको सम्पत्ति व्यवस्थापन तथा बचतकर्ताको रकम फिर्तासम्बन्धी प्रक्रिया थप स्पष्ट हुनेछ ।

पोखराको सिर्जनाचोकस्थित इमेज सहकारीको रकम हिनामिनासम्बन्धी मुद्दामा सहकारीका संस्थापक अध्यक्ष एवं ढोरपाटन नगरपालिकाका प्रमुख देवकुमार नेपालीसहित १५ जनाविरुद्ध अभियोग दायर भएको थियो । प्रारम्भमा ५ सय २४ बचतकर्ताको जाहेरीका आधारमा ५७ करोड ३५ लाख ८४ हजार रुपैयाँ बिगो मागदाबीसहित २०८० भदौ १२ मा मुद्दा दायर गरिएको थियो ।

त्यसमध्ये विभिन्न चरणमा ४ सय जना साना बचतकर्ताको रकम फिर्ता गरी मिलापत्र भएपछि बाँकी १ सय १० बचतकर्ताको पूरक जाहेरीका आधारमा मुद्दा अघि बढाइएको थियो ।

अदालतले नेपालीलाई भने ८ वर्ष कैद र १ करोड २६ लाख २३ हजार रुपैयाँ जरिवाना तोकेको छ । सहकारीका सञ्चालक चित्रबहादुर भण्डारी र शक्ति किसानलाई जनही ७ वर्ष कैद तथा समान जरिवाना हुने फैसला भएको छ ।

इमेज सहकारीको पोखरा प्रकरणमा दोषी ठहर भएका पौडेलसहितका व्यक्तिमाथि बचतकर्ताको रकम हिनामिना गरेको आरोप लागेको थियो । सहकारीले २०८० वैशाखमा तरलता अभाव देखाउँदै कार्यालय बन्द गरेपछि बचतकर्ताले रकम फिर्ता पाउन सकेका थिएनन् ।

सहकारीका संस्थापक अध्यक्ष नेपाली कार्यालय बन्द गरेर सम्पर्कविहीन भएपछि उनीविरुद्ध पक्राउ पुर्जी जारी भएको थियो । पछि इन्टरपोलमार्फत रेड नोटिस जारी भएपछि उनलाई २०८१ असोज १२ मा भारतको नयाँदिल्लीबाट पक्राउ गरिएको थियो । त्यसयता उनी बागलुङ कारागारमा पुर्पक्षका लागि थुनामा छन् ।

इमेज सहकारीको बागलुङ शाखासँग सम्बन्धित मुद्दामा पनि नेपालीसहितका व्यक्तिविरुद्ध ठूलो रकमको बिगो मागदाबी गरिएको छ । बागलुङमा मात्रै १ हजार ५ सय ४३ बचतकर्ताले जाहेरी दिएका थिए । त्यहाँ १ अर्ब ३० करोड ७६ लाख ९८ हजार रुपैयाँ बिगो मागदाबी गरिएको थियो ।

इमेज सहकारीसँगै नेपाली जोडिएको पोखराको सूर्यदर्शन सहकारीको मुद्दा पनि कास्की जिल्ला अदालतमा विचाराधीन छ । सहकारीको रकमबाट व्यक्तिगत सम्पत्ति आर्जन गरेको आरोपमा नेपालीविरुद्ध सम्पत्ति शुद्धीकरणसम्बन्धी मुद्दासमेत बागलुङमा विचाराधीन छ ।

प्रकाशित मिति : November 18, 2026 at 7:17 am

https://www.nabilbank.com/individual
https://www.nimb.com.np/