राष्ट्रिय हितको संरक्षण हुने गरी काम गर्न सरकारी वकिलहरूलाई प्रधानमन्त्री ओलीको आग्रह
८ पुस, काठमाडाैँ । प्रधानमन्त्री केपी शर्मा ओलीले समाजमा अपराध हुन नदिने र अपराध भएमा प्रभावकारी तरिकाले अनुसन्धान गरेर दोषीलाई उन्मुक्ति दिन नहुने बताउनुभयो । महान्यायाधिवक्ता कार्यालयले आज आयोजना गरेको ‘सरकारी वकिलको दोस्रो राष्ट्रिय सम्मेलन’मा उहाँले फौजदारी न्याय राम्रोसँग दिनका लागि प्रहरी, अदालत, पीडित र अपराधीबीच रहेर प्रश्न नउठ्ने गरी व्यावसायिक तरिकाले काम गर्नुपर्नेमा जोड दिनुभयो ।
प्रधानमन्त्री ओलीले सामाजिक न्याय र समानताका लागि अलि गहन तरिकाले काम गर्नुपर्ने, गरीब धनी मात्र नभई र राष्ट्रिय हितको संरक्षण हुने गरी काम गर्न आग्रह गर्नुभयो । प्रधानन्यायाधीश ओमप्रकाश मिश्रले सरकारी वकिलको कार्यशैलीमा आशातित सुधार भएको र अपराध अनुसन्धान गर्दा व्यावसायिक तथा वस्तुनिष्ठ ढङ्गले गर्नुपर्ने बताउनुभयो । उहाँले सरकारी वकिलले मुद्दामा बहस पैरवी गर्दा अनुसन्धान गरी बहस गर्ने परिपार्टीको पनि विकास हुँदै गएको आफूले महसुस गरेको र आगामी दिनमा पनि अझ वृद्धि गर्दै लैजानुपर्नेमा जोड दिनुभयो ।
राष्ट्रियसभाका अध्यक्ष गणेशप्रसाद तिमिल्सिनाले देशभरका कानून व्यवसायीले नेपालको संविधान र मुलुकी संहितालाई एकरुपतामा बुझ्न सकेमा काममा सफलता हासिल हुने बताउनुभयो ।
महान्यायाधिवक्ता अग्नि खरेलले सरकारी वकिलको संस्थागत विकास तथा आगामी दिनका लागि सम्मेलनले रणनीतिक योजना तय गर्ने जानकारी दिनुभयो ।
नेपाल बार एशोसिएसनका अध्यक्ष शेरबहादुर केसीले नेपालले अन्तर्राष्ट्रिय सन्धि÷सम्झौतामा हस्ताक्षर गरेको कुरालाई ध्यान दिँदै इन्काउटरका नाममा व्यक्तिको हत्या गर्न नहुने र दोषी देखिए कानूनबमोजिम कारवाही गर्नुपर्नेमा जोड दिनुभयो ।
प्रहरी महानिरीक्षक सर्वेन्द्र खनालले सरकारी वकिलको प्रभावकारी अनुसन्धानबिना प्रहरीले राम्ररी काम गर्न नसक्ने उल्लेख गर्दै पीडित मैत्री अनुसन्धान पद्धति जरुरी भएको उल्लेख गर्नुभयो ।
सो अवसरमा सर्वोत्कृष्ट सरकारी वकिललाई सम्मान गरिएको छ । राष्ट्रपति भण्डारीले ‘एटर्नी अफ द इयर’ का रुपमा नायब महान्यायाधिवक्ता किरण पौडेललाई मेडल र पुरस्कारद्वारा सम्मान गर्नुभयो । तीनदिनसम्म चल्ने सम्मेलनमा देशभरबाट ३०० सरकारी वकिलको उपस्थिति रहेको छ ।
प्रकाशित मिति : ८ पुष २०७५, आईतवार २३:५८
