हामी जबजको मार्गदर्शनमा समाजवाद हासिल गर्न चाहन्छौँः योगेश भट्टराई

२६ भदाै, काठमाडाैँ । नेकपा (एमाले)का सचिव तथा प्रतिनिधिसभा सदस्य योगेश भट्टराईले जनताको बहुदलीय जनवाद(जबज) को मार्गदर्शनमा नेपाल शान्तिपूर्ण बाटो मार्फत समाजवादतर्फ अघि बढिरहेको बताएका छन् । सचिव भट्टराईले आफूहरुले शान्तिपूर्ण प्रक्रिया मार्फत नेपाली जनताको बलियो समर्थन सहित समाजवाद हासिल गर्न चाहेको तर नेपाल त्यसै तर्फ अघि बढेको बताएका हुन् ।

‘सोसियल साइन्स एकेडेमी’ अर्थात् चिनियाँ सामाजिक विज्ञान प्रतिष्ठानको आयोजनामा बेइजिङमा आयोजित १४ औं विश्व समाजवाद फोरमलाई सम्बोधन गर्दै एमाले सचिव भट्टराईले जबज नेपाली भूमिमा माक्र्सवादको सृजनात्मक प्रयोग रहेको र त्यसकैको आलोकमा समाजवाद हासिल गर्न चाहेको बताए ।

‘नेपालमा हामी समाजवादी उन्मुख संविधान स्वीकार गर्दै सामाजिक–आर्थिक असमानतालाई सम्बोधन गर्न अघि बढिरहेका छौं, जसमा प्रमुख राजनीतिक दलहरूको सामूहिक विवेक समावेश छ । हाम्रो पार्टी नेकपा (एमाले) ले स्वार्गिय कमरेड मदन भण्डारीको नेतृत्वमा ‘जनताको बहुदलीय जनवाद (जबज) को सिद्धान्त विकास गरेको छ,’ सचिव भट्टराईले सम्बोधनमा भनेका छन्, ‘हामी जबजको मार्गदर्शनमा हामी नेपाली तरिकामा शान्तिपूर्ण माध्यमबाट समाजवादतर्फ अघि बढिरहेका छौं । जबज नेपाली अभ्यास र नेपाली भूमिमा माक्र्सवादको रचनात्मक प्रयोगमा आधारित छ । हामी शान्तिपूर्ण प्रक्रियामा जनताको बलियो समर्थनसहित समाजवाद हासिल गर्न चाहन्छौं । यो नयाँ युगको नेपाली मोडेल र विशेषताहरूको क्रान्ति हो ।’

बेइजिङमा जारी १४ औं विश्व समाजवाद फोरममा विश्वका ३० देशका कम्युनिष्ट नेता, माक्र्सवादी बुद्धिजीवि, विश्वविद्यालयका प्राध्यापक, अनुसन्धानकर्ता गरी ५० विदेशी अथिथि र चिनियाँ नेता, प्राध्यापक, बुद्धिजीवि सहित १ सय ५० बढी सहभागी छन् ।

फोरमलाई सम्बोधन गर्दै नेपालको मुख्य ध्येय नेपालको सार्वभौमसत्ता, भौगोलिक अखण्डता, स्वतन्त्रता रक्षा गर्दै राष्ट्रिय गरिमालाई उन्नत गर्नु र आर्थिक समृद्धि तथा समृद्धि प्रवद्र्धन गर्नु रहेको बताए । यी उद्देश्यहरू हासिल गर्न, हामी एकअर्काको समानताप्रतिको सम्मान, पारस्परिक फाइदाका लागि सहयोग, गुटनिरपेक्षता, संयुक्त राष्ट्रसंघको चार्टर र विश्व शान्तिको मुल्यहरु नेपालले दृढतापूर्वक पालना गर्ने बताए ।

उनले भने, ‘प्रधानमन्त्री सम्माननीय केपी शर्मा ओलीको नेतृत्वमा ‘समृद्ध नेपाल, सुखी नेपाली’ भन्ने राष्ट्रिय आकांक्षालाई पूरा गर्ने हाम्रो महान् चाहनाका साथ हामी सबैका मित्रहरूको समर्थन, सहयोग र ऐक्यबद्धताको अपेक्षा राख्छौं ।’
‘समाजवादी देशहरूबीच सहयोग अपरिहार्य’

सचिव भट्टराईले मानव सभ्यता र पृथ्वीलाई जोगाउन समाजवादी देशहरूबीच सहयोग अपरिहार्य रहेको बताए । उनले भने,‘समाजवादी देशहरू थोरै छन् ती सबै वित्तीय रूपमा पूर्ण वा विकासोन्मुख छैनन् । यस्तो अवस्थामा सहयोग लाभदायक हुन्छ । पुनः समाजवादको मुख्य उद्देश्य सबैको साझा विकास हो । एक्लै हामी कतै पुग्दैनौं । त्यसैले, सहयोग अपरिहार्य छ । हामीले मानव सभ्यता र पृथ्वीलाई जोगाउन समाजवादका लागि हाम्रो ऐक्यबद्धता र सहयोगलाई सुदृढ पार्नुपर्नेछ ।’

सचिव भट्टराईले अतीतमा समाजवादको आलोचना हुँदा मानव पक्षलाई ध्यान दिएको थिएन भन्ने आरोप बारेमा सम्झाउदै समाजवादको कुनै विकल्प नरहेको बताए । उनले भने, ‘समाजवादका आलोचकहरूले समाजवादले मानिसहरूलाई वस्तुका रूपमा वर्गीकृत गर्यो र समाजलाई गणितीय रूपमा विश्लेषण गर्यो भनेका थिए त्यसैले माक्र्सवादलाई मानव सारतत्वप्रति विशेष ध्यान दिन आवश्यक छ । समाजवादले मानव सभ्यताको सवाललाई बेवास्ता गर्न सक्दैन । शोषण र दमनविरुद्धको लडाइँको कुरा भइरहेको छ, साथै मानव पक्ष र मानव सभ्यताको सवाल पनि। यही कुरा समाजवादलाई सुधार गर्न आवश्यक छ। समाजवादको कुनै विकल्प छैन ।’

सचिव भट्टराईले जलवायु परिवर्तनको प्रभाव विश्वको प्रमुख चुनौती रहेको भन्दै जलवायु परिवर्तनविरुद्धको विश्वव्यापी लडाइँ न्यायसंगत हुनुपर्ने बताए । उनले भने, ‘आज हामीले सामना गरिरहेको प्रमुख चुनौती जलवायु परिवर्तनको प्रभाव हो । हिन्दकुश हिमालय क्षेत्रमा अवस्थित देशको रूपमा, नेपाल विश्वव्यापी तापनको प्रभावका कारण अत्यधिक संवेदनशील छ। हिमनदीहरूको पग्लन, समुद्री सतहको वृद्धि, प्राकृतिक प्रकोपहरूको वृद्धि, बाढी, पहिरोहरूले हिमालयन विविधता, पृथ्वी र मानवतामा खतरा ल्याइरहेको छ। करिब ४४ प्रतिशत वन क्षेत्रले ढाकिएको हरियो क्षेत्रको रूपमा चिनिने नेपालको आश्चर्यजनक प्राकृतिक सौन्दर्यलाई विश्वले चिन्छ। हामी विश्वास गर्छौं कि जलवायु परिवर्तनविरुद्धको विश्वव्यापी लडाइँ न्यायसंगत हुनुपर्छ र गरिब तथा सीमान्तकृत मानिसहरूको बाँच्न पाउने अधिकार सुनिश्चित गरिनुपर्छ ।’

‘चीनबाट धेरै कुरा सिक्न चाहन्छौं’

सचिव भट्टराईले चिनियाँ समाजवादको मोडेल सफल रहेको भन्दै चीनबाट अझ धेरै कुरा सिक्न चाहेको बताए । भने, ‘चिनियाँ समाजवादको मोडेल सफल छ। हामी चीनबाट अझ धेरै कुरा सिक्न चाहन्छौं। म तपाईं चिनियाँ कमरेडहरूलाई चिनियाँ कम्युनिस्ट पार्टी र राष्ट्रपति सी जिनपिङको नेतृत्वमा हासिल गरेको ठूला सफलताहरूको लागि धन्यवाद दिन चाहन्छु ।’

उनले विश्व राजनीति ठूलो परिवर्तनको दौरबाट गुज्रिरहेको छ, र नेपालका अन्तर्राष्ट्रिय सम्बन्धहरू पनि त्यही अनुसार परिवर्तन भइरहेको बताए । उनले भने, ‘नेपाल भू–राजनीतिक रूपमा संसारका पहिलो र दोस्रो जनसंख्या भएका देशहरू—चीन र भारतको बीचमा रहेको छ । चीन तीव्र रूपमा समृद्धि तर्फ अघि बढिरहेको छ । हामी यो अवसरलाई नेपाली जनताको समृद्धि र खुशीका लागि काम गर्न उपयोग गर्न चाहन्छौं ।’

सचिव भट्टराईले नेपालले २०१७ मा समृद्धि र विकासको अपेक्षासहित बीआरआईमा हस्ताक्षर गरेको उल्लेख गर्दै बीआरआईबाट ठोस लाभ प्राप्त गर्नेमा आशावादी रहेको बताए । भने, ‘पुनः एकपटक, म हाम्रो देश र पार्टीको दीर्घकालीन एक चीन सिद्धान्तप्रतिको प्रतिबद्धता व्यक्त गर्न चाहन्छु । नेपालले २०१७ मा समृद्धि र विकासको अपेक्षासहित बीआरआईमा हस्ताक्षर गरेको थियो। हामी आशावादी छौं कि आगामी दिनहरूमा बीआरआईबाट ठोस लाभ प्राप्त गर्नेछौं ।’

उनले नेपालका तत्कालीन राष्ट्रपति विद्यादेवी भण्डारी र चीनका राष्ट्रपति सी जिनपिङका साथै नेपालका प्रधानमन्त्री र चीनका उच्चस्तरीय नेताहरूको द्विपक्षीय भ्रमणको सम्झदा गरे । उनले भने, ‘यसै क्षणमा, म नेपालका तत्कालीन राष्ट्रपति श्रीमती विद्यादेवी भण्डारी र चीनका राष्ट्रपति सी जिनपिङका साथै नेपालका प्रधानमन्त्री र चीनका उच्चस्तरीय नेताहरूको द्विपक्षीय भ्रमणलाई सम्झना गर्न चाहन्छु ।’