औषधि व्यवस्था विभागको महानिर्देशकमा पुनः नारायण ढकाल
७ असोज, काठमाडौँ । औषधि व्यवस्था विभागको महानिर्देशक पदमा पुनः नारायण ढकालले कार्यभार सम्हाल्नु भएको छ । सर्वाेच्च अदालतको अन्तरिम आदेश अनुसार स्वास्थ्य तथा जनसङ्ख्या मन्त्रालयले उहाँलाई महानिर्देशक पदको कार्यभार सम्हाल्न पत्र दिएको हो । महानिर्देशक ढकालले भन्नुभयो, “मैले महानिर्देशक पदको जिम्मेवारी असोज ५ गते आइतबारदेखि सम्हालेको छु । म पुनःकाममा फर्किएको छु ।”
स्वास्थ्यसेवा तर्फको कर्मचारी समायोजन अन्तर्गत मन्त्रालयले ११औँ तहमा कार्यरत उहाँलाई राष्ट्रिय औषधि प्रयोगशालाको प्रमुखमा पदस्थापना गरेको थियो । उहाँले मन्त्रालयको सो निर्णय कार्यान्वनयन रोक्न माग गर्दै सर्वाेच्च अदालतमा रिट दायर गर्नुभएको थियो । साउन २१ गते रिटमाथि सुुनुवाइ हुँदा सो निर्णय कार्यान्वयन नगर्न नगराउन सर्वाेच्चले आदेश दिएको थियो ।
मन्त्रालयले दशौं तहका पानबहादुर क्षेत्रीलाई यसअधि निमित्त महानिर्देशकको जिम्मेवारी दिएको थियो । सर्वाेच्च अदालतको अन्तरिम आदेश आएको करीब दश दिनसम्म मन्त्रालयले उहाँलाई जिम्मेवारीको पत्र दिन ढिलाइ गरेको थियो ।
प्रकाशित मिति : ७ आश्विन २०७६, मंगलवार १३:२०
