बोक्सी कुप्रथाविरुद्ध ‘अग्नि दहन’ प्रदर्शन

१३ असार, स्याङजा । स्याङ्जाको गल्याङमा बोक्सी कुप्रथाविरुद्ध ‘अग्नि दहन’ प्रदर्शन गरिएको छ । लैङ्गिक हिंसाविरुद्धको अभियानअन्तर्गत बोक्सी कुप्रथाका विरुद्ध जनचेतना जगाउने उद्देश्यले सामाजिक वृत्तचित्र ‘अग्नि दहन’ प्रदर्शन गरिएको हो । मान्छे बोक्सी हुन्न कहिल्यै राष्ट्रिय जागरण प्रतिष्ठान नेपाल र सामाजिक विकास मन्त्रालय गण्डकी प्रदेश पोखराको संयोजनमा प्रदर्शन गरिएको जनचेतनामूलक वृत्तचित्रलाई गण्डकी प्रदेशका सबै जिल्ला तथा सातै प्रदेशमा प्रदर्शन गरिने प्रतिष्ठान नेपालका अध्यक्ष कोविदशरण उपाध्यायले बताउनुभयो ।

“हाम्रो समाजमा अझै पनि बोक्सीको आरोपमा कुटपिट गर्ने, मलमूत्र खुवाउने, सामाजिक वहिष्कार गर्ने प्रवृत्ति छ”, प्रतिष्ठानका अध्यक्ष उपाध्यायले भन्नुभयो, “समाजमा रहेका अन्धविश्वास, कुरीति, डर भयलाई हटाउन यो अभियानलाई देशैभर पु¥याई प्रदर्शन गरिनेछ ।”समाजमा सदियौँदेखि यसप्रकारका कुप्रथाले जरा गाडेर बसेकाले पनि यस्ता कुरीति तथा कुप्रथाको अन्त्यका लागि बोक्सी कुप्रथाविरुद्ध ‘अग्नि दहन’ निर्माण गरी प्रदर्शन गरिएको प्रतिष्ठानका सचिव रमा त्रिपाठीले बताउनुभयो ।

“हाम्रो समाजमा जबसम्म मानिस सचेत हुँदैनन्, तबसम्म कुप्रथा अन्त्य हुने अवस्था म देख्दिनँ”, गल्याङ नगरपालिका शिक्षा, युवा तथा खेलकूद शाखा प्रमुख केदारनाथ आचार्यले भन्नुभयो, “धर्म संस्कृतिको नाममा समाजमा बोक्सी कुप्रथाले जरा गाडिरहेको अवस्थामा यसको अन्त्यका लागि सामाजिक संस्कारको आवश्यकता छ । घनश्याम लामिछानेद्वारा निर्देशित वृत्तचित्र ‘अग्नि दहन’ ले बोक्सी आरोपमा परेकी महिलाको कथा बोल्छ । फिल्मको कथा, पटकथा र संवाद लोकमणि पौडेलले लेख्नुभएको हो ।रासस