एनपीएल क्रिकेटको टिकटको मूल्य तोकियो, यस्तो छ चारथरी मूल्य

१० मंसिर, काठमाडौँ । नेपाल क्रिकेट संघ (क्यान)ले नेपाल प्रिमियर लिग (एनपीएल) क्रिकेटको पहिलो संस्करणको टिकटको दर निर्धारण गरेको छ । आगामी शनिबारदेखि सुरु हुने खेलको ट्रफीको सोमबार बिहान धरहरा परिसरमा प्रधानमन्त्री केपी शर्मा ओलीले अनावरण गर्नुभएको थियो ।

ट्रफी अनावरण भएकै दिन क्यानले प्रतियोगिताका लागि टिकटको मूल्य तोकेको छ । क्यानले विज्ञप्ति जारी गरिदिएको जानकारी अनुसार चार अवस्थाका टिकटहरू बिक्री हुनेछन । जस अनुसार अनुसार उद्घाटनको दिनमा जनरल तर्फको टिकट मूल्य ३०० रुपैंयाँ र भीआईपीतर्फको टिकट मूल्य ७००‌‌ रुपैयाँ तोकिएको छ ।

त्यसैगरी लिग चरणको अन्य दिनमा जनरल तर्फको टिकट मूल्य ३०० र भीआईपी टिकटको मूल्य ५००‌ रुपैयाँ तोकिएको छ भने प्लेअफका खेलहरूमा जनरल टिकट ५०० रुपैयाँ र भीआईपी टिकट ७००‌ रुपैयाँको‌ तोकिएको छ । त्यस्तै फाइनल खेलमा जनरल टिकट ५००‌ र भीआईपी टिकट १००० रुपैयाँ तोकिएको प्रवक्ता छुम्बी लामाले जानकारी दिनुभएको छ ।