भृकुटीमण्डपमा प्रहरी र यात्रुबीच झडप, गाडीको सीसा फुट्यो

११ पुस, काठमाडौं । काठमाडौं महानगरपालिका र महानगरीय ट्राफिक प्रहरी महाशाखाले राजधानीको रत्नपार्क क्षेत्रमा सवारी साधनमा ‘पिक एण्ड ड्रप’ को नीति अलोकप्रिय साबित भएको छ ।

यो नीति लागु भएपछि यात्रुहरुले दुःख पाएको भन्दै बुधबार बिहान भृकुटीमण्डप क्षेत्रमा प्रदर्शन गरेका छन् । यात्रुहरु आक्रोशित बन्दै मंगलबार पनि विरोधमा उत्रिएका थिए ।

यात्रुहरु विरोधमा उत्रिएलगत्तै प्रहरीले लाठिचार्ज गरी भीडलाई नियन्त्रणमा लिएको छ । ट्राफिक महाशाखाले जाम हटाउने नाममा प्रहरीले दुःख दिने काम गरेको भन्दै सडक छेक्दै प्रदर्शनमा उत्रिएका थिए ।

यात्रुहरु विरोध प्रदर्शनमा उत्रिएलगत्तै सो क्षेत्रको सवारी आवागमन अस्तव्यस्त भएको थियो । प्रहरीको हस्तक्षेपपछि अहिले स्थिति सामान्य रहेको छ । ‘यो नियमले समस्या समाधान गर्नेभन्दा पनि यात्रुलाई सास्ती थपिएको छ,’ गाडी पर्खिरहेकी एक यात्रुले गुनासो गरिन् । यता सवारी चालकहरु पनि यात्रुहरुलाई चढाउन असजिलो भएको बताइरहेका छन् ।