अर्थतन्त्रका समस्या देखाएर राजनीतिक फाइदा उठाउने प्रयास भइरहेको छः प्रधानमन्त्री

५ मंसिर, काठमाडौं । प्रधानमन्त्री पुष्पकमल दाहाल ‘प्रचण्ड’ले अर्थतन्त्रका समस्या देखाएर राजनीतिक फाइदा लिन खोजिएको बताएका छन् । सिंहदरबारमा मंगलबार सरकार र निजी क्षेत्रबीचको छलफलमा बोल्दै प्रधानमन्त्री दाहालले सहकारी, लघुवित्त, बैंक ब्याज, व्यवसायीको कर्जासम्बन्धी समस्या विगतमा विभिन्न कारणले पैदा भए पनि एकथरीले यो समस्या देखाएर राजनीतिक फाइदा उठाउने प्रयास भइरहेको बताएका हुन् ।

त्यस्तै,  प्रधानमन्त्री प्रचण्डले अर्थतन्त्र अझै दबाबमुक्त नरहेको पनि बताएका छन् । ‘अर्थतन्त्रका कयौँ सूचक सकारात्मक रहे पनि अर्थतन्त्र दबाबमुक्त छैन,’ उनले भने, ‘हामीले गम्भीर विमर्शसहित समुचित निस्कर्षमा पुग्नुपर्ने आवश्यकता छ।’ साथै, उनले अर्थतन्त्रका समस्या समाधानका लागि सबै मिलेर जानुपर्ने बताए।