कांग्रेस नेता एवं व्यास नगरपालिकाका मेयर न्यौपाने नगर प्रमुखहरूको विश्व संसदको सदस्यमा निर्वाचित

८ कात्तिक, काठमाडाैँ ।  नेपाली कांग्रेस तनहुँका सभापति समेत रहेका व्यास नगरपालिकाका प्रमुख बैकुण्ठ न्यौपाने नगर प्रमुखहरूको विश्व संसदको कार्यकारी सदस्यमा निर्वाचित भएका छन् । नगर प्रमुखहरूको बेलायतको व्रिष्टोल शहरमा सम्पन्न सम्मेलनबाट न्यौपाने कार्यकारी सदस्यमा निर्वाचित भएका हुन् । सम्मेलनले न्यौपानेसहित आठ जनालाई कार्यकारी सदस्यमा निर्वाचित गरेको छ ।

नयाँ निर्वाचित कार्यसमितिमा बेलायतको व्रिष्टोल नगरका प्रमुख मार्भिन रिज, इटालीको पालेर्मो नगरका प्रमुख लियो लुका ओर्लाण्डो, युगाण्डाको होइमा नगरपालिकाका प्रमुख ग्रेस मेरी मुगासा, जर्मनीको मेनहम नगरका प्रमुख पिटर क्रुज,  अमेरिकाको कोलम्बिया नगरका प्रमुख स्टेफेन के बेनजामिन, लाइवेरियाको मोनरोभिया नगरका प्रमुख जेफर्सन टम्बा कोइजी र नर्वेको स्टेभेङ्गजर नगरका प्रमुख क्रिष्टिन सेगन हेल्गो रहेका छन् ।सम्मेलनमा व्यास नगर प्रमुख न्यौपाने उपस्थित नभए पनि कार्यकारी सदस्यका लागि उम्मेदवारी दिएका कारण निर्वाचित भएका हुन ।