ज्योति मगरको प्रस्तुतिले उत्तेजित युवाहरू मञ्चमा चढ्न खोज्दा झडप, केही घाइते, पाँच पक्राउ

१२ फागुन, कञ्चनपुर । गायिका तथा मोडल ज्योति मगरको प्रस्तुतीले उत्तेजित भएका युवाहरू कार्यक्रमको मञ्चमा उक्लिन खोज्दा कञ्चनपुरमा झडप भएको छ । झडपमा केही घाइते भएका छन भने केही पक्राउ परेका छन । कञ्चनपुरको सदरमुकाम महेन्द्रनगरमा जारी सुदूरपश्चिम औद्योगिक व्यापार मेला तथा कञ्चनपुर पर्यटन महोत्सवमा मगरको प्रस्तुतीका क्रममा झडप भएको हो ।

झडपका क्रममा तीन प्रहरीसहित केही युवा घाइते भएका छन भने उत्तेजित समूहका पाँच जना पक्राउ परेका छन । प्रहरीले ज्योति मगरको प्रस्तुतिका बेला होहल्लाका साथै उच्छृंखल गतिविधि भएको पुष्टि गरेको छ । उत्तेजित भिडलाई नियन्त्रणमा लिन प्रहरीले लाठीचार्जसमेत गरेको छ ।

जिल्ला प्रहरी कार्यालय कञ्चनपुरका प्रहरी निरीक्षक सुरज कार्कीका अनुसार पक्राउ पर्नेमा भुवन विष्ट, २२ वर्षीय महेन्द्र बुढा, २१ वर्षीय दिलिप विष्ट, २३ वर्षीय अभिसेक खड्का र २४ वर्षीय भुवन विष्ट रहेका छन । उनीहरूलाइ हिरासतमा राखेर अनुसन्धान भैरहेको छ ।