भरतपुर महानगरपालिकाका वडा अध्यक्षमाथि अज्ञात समूहकाे आक्रमण
२७ चैत, चितवन । भरतपुर महानगरपालिका वडा नं १० का वडाध्यक्ष अरुण भण्डारीमाथि आज आक्रमण भएको छ ।
अपराह्न ४ः३० बजेको समयमा नारायणगढ बजारमा उनिमाथी अज्ञात समूहले आक्रमण गरेको हो ।
घाइते भण्डारीका अनुसार मोबाइल मर्मतका लागि नारायणगढ बजार गएको समयमा आक्रमण भएको छ । सिद्धी आयल अगाडि रोकी राखेको गाडी चढ्न लाग्दा आफूमाथि एक्कासि आक्रमण भएको उनले जानकारी दिए ।
भरतपुर अस्पतालमा उपचाररत भण्डारीले भने, “गाडी नजिक पुगेको समयमा एक्कासि पछाडिबाट उडेर के आए जस्तो भयो, म एक्कासी भुइँमा लडेँ, त्यसपछि मोबिल छर्किएर टाउकामा ढुंगा प्रहार गरे ।” आक्रमण गर्ने व्यक्ति होचोहोचो कदको र टोपी लगाएको आफूले प्रष्ट देखेको उनले बताए । भण्डारीको टाउको र कुहिनोमा चोट लागेको छ ।
जिल्ला प्रहरी कार्यालयका प्रवक्ता प्रहरी नायब उपरीक्षक शिव शर्मा आचार्यले आक्रमणकारीको खोजी भइरहेको बताए ।
प्रकाशित मिति : २७ चैत्र २०७४, मंगलवार २०:०४
