जनकशिक्षाका कर्मचारीले रूस–युक्रेन युद्धका कारण पुस्तक छाप्न नसकेको बताएपछि शिक्षामन्त्री ट्वाँ

१५ जेठ, काठमाडाैँ । शिक्षा तथा खेलकुदमन्त्री देवेन्द्र पौडेलले जनक शिक्षा सामग्री केन्द्र लिमिटेड सानोठिमीको आकस्मिक अनुगमन गरेका छन । विद्यालय तहको पाठ्यपुस्तक छपाइको जिम्मेवारी पाएको जनक शिक्षाले समयमै पाठ्यपुस्तक छपाई नसक्दा देशभर विद्यालय तहको पाठ्यपुस्तकको अभाव भइरहेका बेला मन्त्री पौडेलले केन्द्रको आकस्मिक अनुगमन गरेका हुन ।

अबको एक हप्ताभित्र देशभरका सरकारी विद्यालयका विद्यार्थीको हात–हातमा पाठ्यपुस्तक पुग्ने गरी तीव्ररुपमा काम गर्न मन्त्री पौडेलले केन्द्रका कर्मचारीलाई निर्देशन दिए । उनले भने, “म मन्त्री भएर आएदेखि नै नयाँ शैक्षिकसत्र सुरु हुनेबित्तिकै प्रत्येक विद्यार्थीको हात–हातमा पाठ्यपुस्तक पुग्नुपर्छ भनेकै थिए, त्यतिखेर जनक शिक्षाकै अनुगमन गर्दा पनि त्यहीँ भनेको थिए, तर त्यसअनुरुप काम भएन, पाठ्यपुस्तक अभावका कारण केन्द्रलाई संसदीय समितिले बोलाउने अवस्था आउनु दुःखद् हो, अबको एक हप्ताभित्र सबै पुस्तक छापेर पु¥याउनु ।”

मन्त्री पाैडेलले स्थानीय तह निर्वाचन र रूस–युक्रेन युद्धका कारण काम गर्न ढिलाइ भएको केन्द्रका पदाधिकारीको भनाइ उचित र पर्याप्त नभएको भन्दै सबै विद्यार्थीको हात–हातमा पुस्तक नपुगेसम्म निरन्तर अनुगमन गर्ने बताए । मन्त्री पौडेलले केन्द्रमा भइरहेको पुस्तक छपाइको अवस्था र तीनवटा पुस्तक भण्डारकक्षको अवलोकन गरेाक थिए ।

केन्द्रका पाठ्यपुस्तक खरिद शाखा प्रमुख रामबहादुर कुँवरले छपाइ र ढुवानीका काम तीव्रगतिमा भइरहेको मन्त्री पौडेललाई जानकारी गराएका थिए । उनले छिट्टै विद्यार्थीको हात–हातमा किताब पुग्ने गरी काम गर्ने प्रबिद्धता व्यक्त गरे । पुस्तक छपाइका लागि कागजको अभाव हुन नदिन र ढुवानीको सहज व्यवस्थाका लागि मन्त्री पौडेलसमक्ष सहयोग र समन्वय गरिदिन उनले आग्रह गरे ।

पुस्तक छपाइमा ढिलाइ हुनुको कारण कागजको अभाव भएको भन्दै उनले भने, “कागज आपूर्ति कम्पनी विद म्याद सिबीसी जेबीलाई समयमा कागज आपूर्ति नगरेवापत धरौटी जफत गर्न हामीले माग गरेको छौँ, तर मन्त्रालयका सचिवले एकपटकलाई भन्दै कारबाही गर्नु भएन, कागज आउनै ढिलाइ भयो ।”

कुँवरले करिब रु एक करोड ९६ लाख थान पुस्तक छपाइ गर्नुपर्नेमा ९० प्रतिशत पुस्तक छपाई भइसकेको जानकारी गराए । केन्द्रमा मन्त्री पौडेल आकस्मिकरूपमा अनुगमन पुग्दा सार्वजनिक बिदामा घर बसेका केन्द्रका प्रबन्ध निर्देशक अनिल झा कार्यालयमा नभएपछि मन्त्रीलाई खरिद शाखाले त्यहाँको अवस्थाको बारेमा जानकारी गराएका थिए । मन्त्री अनुगमन गरेर फर्किएको केही समयपछि मात्रै पाठ्यपुस्तक छपाई गर्ने जिम्मेवारी पाएका केन्द्रमा प्रमुख झा कार्यालय पुगेका थिए ।