बोल्न नपाएको झोँकमा कांग्रेस सांसदद्धारा प्रतिनिधिसभाको बैठक बहिष्कार

१७ साउन, काठमाडाैँ ।  बाेल्न नपाएको झोँकमा कांग्रेस सांसदहरूले प्रतिनिधिसभाकाे बैठक बहिष्कार गरेका छन । परराष्ट्र मन्त्री प्रदीप ज्ञवालीलाई कार्यसूची विपरित बोल्ने समय दिएको भन्दै कांग्रेस सांसदले बैठक बीचमै बहिस्कार गरेका हुन ।

गृहमन्त्री रामबहादुर थापाले सदनमा उठेका प्रश्नहरुको जवाफ दिए लगत्तै प्रश्नोत्तर गर्न उनीहरुले माग गरेका थिए। तर सभामुखले परराष्ट्रमन्त्री ज्ञवालीलाई समय उपलब्ध गराएका थिए। ज्ञवालीले आफ्नो विदेश भ्रमणबारेमा सदनलाई जानकारी गराएसँगै सभामुख कृष्णबहादुर महराले उठिरहेका कांग्रेस सांसदहरुलाई बस्न आग्रह गरेका थिए।

उनले अर्को दिन प्रश्न गर्ने समय दिने भन्दै आज बसेर संसदको कारबाही अगाडि बढाउनको लागि सहयोग गर्न आग्रह गरेका थिए। तर कांग्रेस सांसदहरुले अस्वीकार गरे।  उता सभामुखले भने संसद बैठक अगाडि बढाइरहे। उनले प्रतिनिधिसभाको विषयगत समितिमा रहने सांसदहरुको नाम पढेर सुनाए। यतिबेला पनि कांग्रेस सांसदहरु भने आफ्नो स्थानबाट उठिरहेका थिए।

सभामुखले पुन बस्न आग्रह गर्दै अर्थमन्त्री युवराज खतिवडालाई विमा विधेयक पेश गर्न आग्रह गरे। आफूहरुलाई समय नदिएको र एकोहोरो सदन सञ्चालन गरिरहेको भन्दै कांग्रेस सांसदहरु बैठक छाडेर बाहिरिएका हुन्। यसैबीच, विमा विधेयक पारित भएसँगै बैठक भोलिसम्मका लागि स्थगित गरिएको छ।