साझा यातायातले २४ नयाँ बस भित्र्याउँदै
१५ असार, ललितपुर । साझा यातायातले काठमाडौँ उपत्यका र उपत्यका बाहिर चल्ने गरी नयाँ २४ वटा बस थप गर्ने भएको छ ।
तीमध्ये चारवटा डिलक्स र २० वटा सिटी बस रहेको साझा यातायातका कायम मुकायम कार्यकारी अधिकृत महेन्द्रराज पाण्डेले बताउनुभयो ।
“केही महिना पहिले बस खरिदका लागि ठेक्का सम्झौता भएको थियो, तीमध्ये चारवटा बस एक साताभित्रै काठमाडौँ आइपुग्नेछ,” उहाँले भन्नुभयो, “ बस आइसकेपछि यसको सञ्चालन प्रक्रिया अघि बढाइनेछ ।”
बाँकी २० वटा बस पनि केही समयमै उपत्यका भित्रने कायम मुकायम कार्यकारी अधिकृत पाण्डेले जानकारी दिनुभयो ।
अहिले काठमाडौँ उपत्यका र उपत्यका बाहिर साझा यातायातको माग बढिरहेको छ । “हामीले माग भएका सबै ठाउँमा बस सञ्चालन गर्न सकेका छैनौँ,” उहाँले भन्नुभयो ।
प्रकाशित मिति : १५ असार २०७५, शुक्रबार १६:४८
