कलेजको खारेज हुने धम्की दिएर घुस खाने त्रिविका सहायक डीन पटेलविरूद्ध मुद्दा, जागिर चट

२४ असार, काठमाडौँ । ५० हजार घुससहित पक्राउ परेका त्रिभुवन विश्वविद्यालयका सहायक डीन शम्भुप्रसाद पटेलविरुद्ध विशेष अदालतमा भ्रष्टाचार मुद्दा दायर भएको छ । कलेज सञ्चालनको अनुमति रद्द हुन सक्ने भनी डर/त्रास देखाई सेवाग्राहीसँग ५० हजार घुस रकम लिइसकेको अवस्थामा पक्राउ परेका पटेलविरुद्ध भ्रष्टाचार निवारण ऐन, २०५९ को उपदफा (१) बमोजिम विशेष अदालतमा मुद्दा दायर गरेको हो ।

उक्त ऐनमा २५ हजारदेखि ५० हजारसम्म घुस लिने वा लिन मञ्जुर गर्नेलाई कसुरको मात्रा अनुसार ३ महिनादेखि ४ महिनासम्म कैद र बिगो बमोजिम जरिबाना हुने तथा घुस लिइसकेको भए सो उक्त रकम समेत जफत हुने उल्लेख छ । अख्तियारले ५० हजार विगो कायम गरी विशेष अदालतमा मंगलवार रिट दायर गरेको प्रवक्ता प्रदीपकुमार कोइरालाद्वारा बिहीवार जारी विज्ञप्तिमा उल्लेख छ ।