विदेशी नागरिकको उद्धार तथा खोजीका लागि आपत्‌कालीन प्रतिकार्य टोली गठन

११ भदौ, काठमाडौं । परराष्ट्र मन्त्रालयले भोटेकोशीको आकस्मिक बाढीबाट प्रभावित विदेशी नागरिकहरूको खोजी, उद्धार तथा कन्सुलर सहयोगका लागि आपत्कालीन प्रतिकार्य टोली (इमर्जेन्सी रेस्पोन्स टिम–ईआरटी) गठन गरेको छ।

मन्त्रालयले बिहीबार सूचना जारी गर्दै तत्काल प्रभावबाट गठन गरिएको ईआरटीले बाढीबाट प्रभावित, बेपत्ता वा घटनासँग सम्बन्धित विदेशी नागरिकको खोज तथा उद्धार, सूचनाको प्रमाणीकरण तथा कन्सुलर सहयोगका लागि मन्त्रालयभित्र केन्द्रीय समन्वयकारी निकायका रूपमा काम गर्ने जनाएको छ।

मन्त्रालयका अनुसार विदेशी नागरिकसम्बन्धी आवश्यक सूचना संकलन, सम्बन्धित निकायसँग समन्वय तथा परिवार र कूटनीतिक नियोगलाई आवश्यक जानकारी उपलब्ध गराउन ईआरटीले सहजीकरण गर्नेछ।

विदेशी कूटनीतिक नियोग, अन्तर्राष्ट्रिय संघसंस्था, बेपत्ता व्यक्तिका परिवार तथा सर्वसाधारणलाई रसुवाको बाढीसँग सम्बन्धित प्रभावित वा बेपत्ता विदेशी नागरिकबारे कुनै सूचना भए ईआरटीको हटलाइन वा इमेलमार्फत जानकारी गराउन मन्त्रालयले आग्रह गरेको छ। त्यसका लागि +९७७–९७४४४४१२२७ र +९७७–९७४४४४१२२८ मा आपत्कालीन हटलाइन/ह्वाट्सएपमार्फत सम्पर्क गर्न सकिनेछ। दोस्रो नम्बरमा बिहान ७ बजेदेखि राति १० बजेसम्म सम्पर्क गर्न सकिने मन्त्रालयले जनाएको छ। त्यस्तै, [email protected] मा इमेलमार्फत पनि जानकारी दिन सकिने मन्त्रालयले जनाएको छ ।