कात्तिक महिनाका लागि पनि घट्यो ब्याजदर, कुन बैंकले कति घटाए?

३० असोज, काठमाडौं । कात्तिकका लागि वाणिज्य बैंकहरूले निक्षेपमा दिने ब्याजदर घटेको छ । कात्तिकका लागि २० वाणिज्य बैंकहरूको व्यक्तिगत मुद्दती निक्षेपमा अधिकतम ब्याजदर औसत ०.२१ प्रतिशतले घटेको छ ।

असोज महिनामा यी बैंकको अधिकतम व्यक्तिगत मुद्दतीको औसत ब्याजदर ६.३९ प्रतिशत रहेकोमा कात्तिकमा ६.१८ प्रतिशतमा झरेको छ ।

सार्वजनिक सूचना अनुसार कात्तिकमा सानिमा बैंकले व्यक्तिगत मुद्दतीको अधिकतम ब्याजदर असोजको तुलनामा बढाएको छ भने १० बैंकले ब्याजदर घटाएका छन् ।

त्यस्तै, यस्तो ब्याजदर ९ वटा बैंकले स्थिर राखेका छन् ।

व्यक्तिगत मुद्दती निक्षेपको ब्याजदर घटाउने बैंकहरूमा सिटिजन्स, नबिल, सिद्धार्थ, स्टान्डर्ड चार्टर्ड, कृषि विकास, राष्ट्रिय वाणिज्य, लक्ष्मी सनराइज, प्राइम, एनआईसी एसिया र हिमालयन बैंक रहेका छन् ।

त्यसैगरी, स्थिर राख्नेमा नेपाल, इन्भेस्टमेन्ट मेगा, माछापुच्छ्रे, ग्लोबल आईएमई, कुमारी, एसबीआई, एभरेस्ट, एनएमबी र प्रभु रहेका छन् ।

व्यक्तिगत मुद्दतीमा अधिकतम ब्याजदर ७ र न्यूनतम ब्याजदर जम्मा ५.७५ प्रतिशत कायम भएको र लामो अवधिको व्यक्तिगत मुद्दती निक्षेपमा केही उच्च ब्याजदर र छोटा अवधिको मुद्दती निक्षेपमा ब्याजदर केही कम गर्ने बैंकले जनाएको छ।