सर्लाहीमा एक जनाकाे गाेली हानी हत्या

१३ कात्तिक, सर्लाही । सर्लाहीको रामनगरमा आजबिहान नेकपा र कांग्रेस समर्थकबीचको झडपमा गोली चल्दा एक कांग्रेस समर्थकको मृत्यु भएको छ । घटनामा चार जना घाइते भएका छन् । गोली प्रहारबाट रामनगर गाउँपालिका–४ बहुअर्वाका ६० वर्षीय रामविलास महतोको मृत्यु भएको जिल्ला प्रहरी कार्यालय सर्लाहीले जनाएको छ । बिहान ८ बजे भएको घटनामा महतोको घटनास्थलमा नै मृत्यु भएको हो।

अन्य घाइतेको स्थानीय स्वास्थ्य संस्थामा उपचार भइरहेको छ। मृतक महतो रामनगर गाउँपालिका ४ मा कांग्रेसबाट निर्वाचित वडा अध्यक्ष रामनरेश महतोका काका हुन्। वडा अध्यक्षमा कांग्रेसबाट महतो निर्वाचित भएपछि तत्कालीन माओवादी समर्थकसँग पटकपटक विवाद हुँदै आएको छ। सोमबार वडा अध्यक्ष महतोलाई हातपात समेत भएको थियो।