युएईमा नेपाली चेलीहरुको झगडाः नुवाकोटकी सोनी तामाङले ४ साथीमाथि छुरा प्रहार गर्दा एकको मृत्यु
११ कात्तिक, युएई । युएर्इमा नेपाली चेलीहरुबीच झगडा हुँदा नुवाकोटकी सोनी तामाङले ४ साथीमाथि छुरा प्रहार गर्दा एकजनाको मृत्यु भएको छ । युएईको शारजाहस्थित एकै कम्पनीमा कार्यरत चारजना साथीमाथि तामाङले छुरा प्रहार गरेकी थिइन् । छुरा प्रहारबाट काठमाडौंकी सिर्जना बरालको मृत्यु भएको अबुधाबीस्थित नेपाली दूतावासले जानकारी दिएको छ ।
ठेगाना नखुलेका गम्भीर घाइते ३ जनामा ममता चौधरीको आईसियुमा उपचार भइरहेको छ भने घटनामा घाइते सलिना मगर र आशा दर्जी उपचारपछि कार्यस्थल फर्किसकेका छन् । बिहीबार राति तामाङले मादक पदार्थ सेवन गरी झगडा सुरु गरेको र झगडाले उग्ररुप लिएपछि छुरा प्रहार गरेको नेपाली दूतावास अबुधाबीका कार्यवाहक राजदूत सागरप्रसाद फुयाँलले जानकारी दिएका छन् ।
हत्यामा संल्गन तामाङलाई उनले प्रयोग गरेको छुरासहित प्रहरीले नियन्त्रणमा लिएको छ । उनीमाथि अनुसन्धान चलिरहेको र युएईको कानूनअनुसार हत्या अभियोगमा दोषी ठहरिएमा मृतकको परिवारको इच्छा अनुसार हत्यामा संलग्नलाई मृत्युदण्ड वा ब्लडमनीको जरिवाना हुन सक्ने प्रावधान छ ।
प्रकाशित मिति : ११ कार्तिक २०७५, आईतवार १५:५६
