बिलबिजक भन्दा बढी र फरक सामान बोकेको चारवटा ट्रक सशस्त्र प्रहरीको नियन्त्रणमा

८ साउन, काठमाडाैँ । बिलबिजक भन्दा बढी र फरक सामान बोकेको चारवटा ट्रक सशस्त्र प्रहरी बलले नियन्त्रणमा लिएको छ । पर्सा जिल्लाको बीरगंज महानगरपालिका ८ घण्टाघर ईलाकाबाट करिब १ करोड ९८ लाख २० हजार ३ सय १५ रुपैयाँ बराबरको सामान सहित चारवटा ट्रक नियन्त्रणमा लिएको सशस्त्र प्रहरी बलका सहायक प्रवक्ता डिएसपी शैलेन्द्र थापाले दैनिकीलाई जानकारी दिए ।

सहायक प्रवक्ता थापाले बिलविजक भन्दा बढि र फरक सामान बोकेको भन्ने विशेष सूचनाको आधारमा नम्बर १३ गण पर्साले बीरगंजबाट पथलैयातर्फ जाँदै गरेको ना २ ख ९४९१, ना ४ ख ८३३४, ना ३ ख १००९ र ना ३ ख ८०३९ नम्बरको ट्रक नियन्त्रणमा लिएको जानकारी दिए ।

नियन्त्रणमा लिइएका ट्रकमा औषधी, किराना तथा हार्डवयर र कम्प्युटरका पार्ट्स लगायतका सामानहरु रहेका छन् । सामान सहितका ट्रक आवश्यक अनुसन्धानको लागि राजश्व अनुसन्धान कार्यालय पथलैयामा बुझाइएको थापाले बताए ।