नेपालमा मात्र होइन अमेरिकामा पनि बलात्कारका घटना हुन्छः गृहमन्त्री थापा
१० असाेज, काठमाडौँ । गृहमन्त्री रामबहादुर थापा ‘बादल’ले नेपालमा मात्रै नभएर विकसित देशमा पनि बलात्कार र हत्याका घटना हुने गरेको बताएका छन् ।संसदको राज्य व्यवस्था समितिको आजको बैठकमा सांसदहरुले उठाएको प्रश्नमाथि जवाफ दिने क्रममा उनले सबैभन्दा लोकतान्त्रिक भन्ने अमेरिकामा पनि बलात्कार र हत्याका घटनाहरु बाहिर आइरहेको बताए ।
उनले सूचना प्रविधिमा आएको विकास र अत्याधिक मदिरा सेवन जस्ता कारणले पनि यस्ता घटना बढिरहेको बताए । कञ्चनपुरकी १३ वर्षीया किशोरी निर्मला पन्त बलात्कार र हत्यामा संलग्न दोषी छिट्टै पक्राउ पर्ने दाबी गरे । ‘निर्मला हत्या र बलात्कारको घटनामा हिजोमात्रै उच्चस्तरीय छानबिन समितिले प्रतिवेदन बुझाएको छ ’ उनले भने, ‘दोषीलाई छिट्टै कानुनी दायरमा ल्याउँदै छौं । यसबारे अझैं अनुसन्धान भइरहेको छ ।’,
निर्मला पन्त प्रकरणसहित अन्य यौन हिंसा, हत्या लगायतका घटनामा संलग्नलाई कडा भन्दा कडा कारबाही गरिने बताउँदै थापाले रौतहट र नवलपरासीमा महिलामाथि एसिड आक्रामण गर्नेलाई नियन्त्रणमा लिइ सकिएको जानकारी दिए ।
प्रकाशित मिति : १० आश्विन २०७५, बुधबार १३:३१
