अल्टिच्युड एयरको हेलिकोप्टर दुर्घटना, ५ जनाकाे मृत्यु, भाग्यले बाँचिन डोल्मा
२३ भदाै, नुवाकोट । गोरखाबाट काठमाडौं आउने क्रममा सम्पर्कविहीन भएको अल्टिच्युड एयरको हेलिकोप्टर नुवाकोटमा दुर्घटना भएको नुवाकोट प्रहरीका प्रमुख बसन्त कुँबरले पुष्टि गरेका छन । नुवाकोट जिल्लाको मेघाङ गाउँपालिका १ बर्सुङचेतको मैलुङपाखाको जंगलमा दुर्घटनाग्रस्त अवस्थामा भेटिएको छ कुँवरले दैनिकीसँग भने ।
गोरखाको सामागाउँबाट काठमाडौं जाँदै गर्दा बेपत्ता भएको कल साइन ९ एन–ए–एल–एस को अल्टिच्युड एअरको हेलिकोप्टर दुर्घटनाग्रस्त अवस्थामा फेला पारेको उनले बताए । कुवरका अनुसार घटनास्थलमा ५ जनाको शव भेटिएको छ भने १ जनालाई अचेत अवस्थामा उद्धार गरिएको छ । घटनास्थलमा ५ जनाको शव भेटिएपनि कसैको शनाखत हुन नसकेको बताए ।
हेलिकोप्टरका पाइटलसहित ५ जनाको मृत्यु भएको छ भने एक जना जिवितै भेटिएका छन् । जीवितै भेटिएकी डोल्मा आनीको उद्दार प्रयास भइरहेको कुँवरले जानकारी दिए । नुवाकोटका प्रमुख जिल्ला अधिकारी उद्दारबहादुर थापाले पनि मेघाङ स्थानमा दुर्घटनाग्रस्त हेलिकोप्टर भेट्टाएको पुष्टि गरेका छन ।
(यसअघि मृतकको संख्या ५ हनुपर्नेमा अन्यथा भएकोले सच्याइएको छ ।–सम्पादक)
प्रकाशित मिति : २३ भाद्र २०७५, शनिबार १५:३७
