मिथिला संस्कृति वैभवपूर्णः मुख्यमन्त्री पोखरेल
मधेस प्रदेशको मैत्रीपूर्ण तीन दिने सद्भावना भ्रमणमा रहनुभएका गण्डकी प्रदेशका मुख्यमन्त्री कृष्णचन्द्र नेपाली पोखरेलले मिथिला सभ्यता र संस्कृति अनुपम र गौरवपूर्ण भएको बताउनुभएको छ । भ्रमणको दोस्रो दिन आज आइतबार महोत्तरीको बर्दिबास पुग्नुभएका पोखरेलले भ्रमणको अनुभव साट्दै मधेस धार्मिक पर्यटनको केन्द्र रहेको बताउनुभएको हो । मुख्यमन्त्री पोखरेल नेपाल होटल पर्यटन व्यवसायी सङ्घ, बर्दिबासका उद्यमी व्यवसायी र सञ्चारकर्मीसँग परिचयात्मक कार्यक्रममा सहभागी हुनुहुन्थ्यो ।
“मैले मधेश प्रदेशका प्राचीन मिथिलाका धार्मिकस्थलको नजिकबाट अवलोकन गरें”, उहाँले भन्नुभयो, “यहाँ धार्मिक पर्यटन विकासको प्रचुर सम्भावना रहेछ ।” जनकपुरधामका जानकी मन्दिर, राममन्दिर, मणिमण्डप, जनकमन्दिर र धनुषाधामको अवलोकन गर्नुभएका मुख्यमन्त्री पोखरेलले शनिबार जनकपुरदेखि कुर्थासम्म रेलयात्रा गरेको रमाइलो अनुभव सुनाउनुभयो ।
संसारका सबै ठाउँमा अतिथि सत्कारको परम्परा भए पनि मिथिलाको भने विशिष्ट रहेको उहाँको भनाइ छ । “रेल पछिल्लोकालमा थुप्रै नेपालीको मनमा रहेको सपना छ, अब चाँडै आम जनताले यो सेवा पाउने सम्भावना देखें”, मुख्यमन्त्री पोखरेलले भन्नुभयो, “मधेशमा अन्न उत्पादन, पशुपालनसँगै धार्मिक पर्यटन विकास गर्नसके समृद्धि प्राप्त हुने अवस्था छ ।” विदेहराज जनकको कर्मभूमि, याज्ञवल्क्य, गार्गीसहितका विद्वान, विदूषिको तपोभूमि हुनुको गर्विलो इतिहास मधेशसँग रहेको उहाँले स्मरण गर्नुभयो ।
मधेश प्रदेश सरकारको निमन्त्रणामा शनिबार पोखरा–जनकपुर हवाई यात्राको शुभारम्भ गर्दै मुख्यमन्त्री पोखरेल जनकपुर आइपुग्नु भएको हो । शनिबार प्रारम्भ भएको जनकपुर–पोखरा हवाई सेवा बुद्ध एयरले सातामा तीन दिन दिने भएको छ । आफ्नो भ्रमणमा गण्डकी र मधेश प्रदेशबीच धार्मिक पर्यटकीय सर्किट विकास र आपसी सद्भाव एवं समन्वय मुख्य छलफलका विषय बनेका उहाँले बताउनुभयो ।
मुख्यमन्त्री पोखरेलले बर्दिबास–५ स्थित श्री टुटेश्वरनाथ महादेव मन्दिरको दर्शन र बाराको गढीमाई मन्दिर अवलोकन पनि आजै गर्नुहुने कार्यक्रम छ । मुख्यमन्त्री पोखरेल सोमबार गण्डकी फर्कनुहुनेछ ।
प्रकाशित मिति : २२ फाल्गुन २०७८, आईतवार १३:२१
