मुद्दती निक्षेपमा साढे १० करोड लगानी गर्दै राष्ट्र बैंक
१६ माघ, काठमाडौं । नेपाल राष्ट्र बैंकले बैंक तथा वित्तीय संस्थाको मुद्दती निक्षेपमा साढे १० करोड रुपैयाँ लगानी गर्ने भएको छ । यसअघि पनि पटकपटक गरी १० अर्बभन्दा बढी रुपैयाँ बैंक तथा वित्तीय संस्थाको मुद्दती निक्षेपमा लगानी गरिसकेको राष्ट्र बैंकले थप यो रकम लगानी गर्न लागेको हो ।
आफ्नो विभिन्न कोषमा रहेको १० करोड ४८ लाख रुपैयाँ वाणिज्य बैंक, विकास बैंक र फाइनान्स कम्पनीहरूको मुद्दती निक्षेपमा एक वर्षे अवधिका लागि लगानी गर्ने नेपाल राष्ट्र बैंकले जनाएको छ ।
केन्द्रीय बैंकले ‘क’ वर्गका वाणिज्य बैंकमा आठ करोड ३८ लाख रुपैयाँ, ‘ख’ वर्गका विकास बैंकहरूमा एक करोड ५८ लाख रुपैयाँ र ‘ग’ वर्गका वित्त कम्पनीहरूमा ५२ लाख रुपैयाँ गरी कुल १० करोड ४८ लाख रुपैयाँ लगानी गर्न लागेको हो ।
आगामी फागुन १ देखि २०७७ फागुन १ सम्मका लागि मुद्दती निक्षेप यो रकम राख्न लागेको राष्ट्र बैंकले जनाएको छ । निक्षेप लिन चाहने बैंक तथा वित्तीय संस्थाहरूले आफूले लिन चाहेको रकम तथा उक्त रकममा प्रदान गर्ने ब्याजदरसमेत उल्लेख गरी माघ १७ सम्म राष्ट्र बैंकमा बोल कबोल पेस गनुपर्नेछ ।
बैंकले यही माघ १७ सम्म वित्त व्यवस्थापन विभागमा आवेदन दिन बुधबार एक सूचनामार्फत आग्रह गरेको छ । यसरी राखिएको मुद्दती निक्षेपको ब्याज बैंक तथा वित्तीय संस्थाले मासिक रूपमा भुक्तानी गर्नुपर्ने राष्ट्र बैंकले जनाएको छ ।
राष्ट्र बैंकको निक्षेप लिनका लागि बैंक तथा वित्तीय संस्था सञ्चालनमा आएको कम्तीमा दुई वर्ष पूरा गरेको हुनुपर्ने छ भने राष्ट्र बैंकले तोकेको न्यूनतम पुँजीकोष कायम हुनुपर्ने जनाएको खबर गोरखापत्र दैनिकमा छ ।
मुद्दती निक्षेप लिनका लागि निष्क्रिय कर्जा कुल कर्जा सापटीको पाँच प्रतिशतभन्दा कम हुनुपर्ने, खुद तरल सम्पत्ति स्वदेशी निक्षेपको कम्तीमा २० प्रतिशत वा सोभन्दा बढी रहेको हुनुपर्ने, कर्जा र स्वदेशी निक्षेप र प्राथमिक पुँजी अनुपात बैंकले समयसमयमा निर्धारण गरेको सीमाभित्र रहेको हुनुपर्ने प्रावधान राखिएको छ ।
प्रकाशित मिति : १६ माघ २०७६, बिहीबार ०७:१३
