भारतकी मंगायम्माले ७३ वर्षको उमेरमा जुम्ल्याहा छोरी जन्माइन

२० भदाै, काठमाडाैँ । बीबीसी हिन्दीका अनुसार भारतको आन्ध्र प्रदेश राज्यस्थित गुन्टुर जिल्लाकी ७३ वर्षीया वृद्धाले जुम्ल्याहा बच्चा जन्माएकी छन् । येरामति मंगायम्माले बुधबार बिहान साढे १० बजे बच्चा जन्माएकी हुन् । ‘आमा र बच्चाहरूको स्वास्थ्य अहिले ठिक छ। शिशुहरूलाई २१ दिनसम्म चिकित्सकको निगरानीमा राखिनेछ,’ उनको शल्यक्रियामा संलग्न डा उमा शंकरले बिबिसीसँग भनिन् । शल्यक्रिया गरेर उनीबाट जुम्ल्याहा छोरीको निकालिएको हो ।

सबैभन्दा बढी उमेरमा बच्चा जन्माउनेमा यी वृद्धाले कीर्तिमान बनाउन सक्ने ठानिएको बीबीसीले जनाएको छ। यसअघि सन् २००६ मा स्पेनमा जुम्ल्याहा बच्चा जन्माएकी महिलाको उमेर ६६ वर्ष थियो । जुम्ल्याहा पाएपछि प्रसन्नता व्यक्त गर्दै मंगायम्माले भनिन्, ‘मानिसहरूले मलाई बाँझी भन्ने गर्थे। मैले धेरै पीडा झेलेकी छु। अतः मैले बच्चा जन्माउने निर्णय गरेँ। मेरो जीवनको यो सबैभन्दा खुसीको क्षण हो।’