नेपाली सेनालाई केरुङ हुँदै चीनबाट आयो ३० ट्रक सैन्य सहयोग, सैन्य अभ्यास काठमाडौँमा जारी

१८ भदाै, काठमाडौँ । चिनियां राष्ट्रपति सि जिनफिङको नेपाल भ्रमणपूर्व चीनले नेपाली सेनालाई ठुलो मात्रामा सैनिक सहयोग हस्तान्तरण गरेकोछ । प्रधानसेनापति पूर्णचन्द्र थापा गत असारमा १ साता लामो चीन भ्रमणमा जाँदा सैनिक सहायतासम्बन्धी सम्झौतामा हस्ताक्षर भएको थियो ।

नेपाली सेनालाई चिनले २३ करोड ९५ लाख ५० हजार बरावरको सैनिक सहयोग हस्तान्तरण गरेको हो । सम्झौताबमोजिम ३० ट्रक सहायता सामाग्री केरुङ हुँदै काठमाडौँ पुगेको हो । नेपाली सेनाका ट्रकमा लोड गरेर सैनिक सामाग्री केरुङबाट शनिवार साँझ काठमाडौँ पुगेको हाे ।

चीन र नेपालबीच पछिल्लो समय सैनिक सम्बन्ध समुधुर हुंदै गएको छ । नेपाल र चीनबीचको संयुक्त सैन्य अभ्यास गत बुधबारबाट काठमाडौँमा सुरु भएको छ । सगरमाथा फ्रेन्डसिप संयुक्त तालिम २०१९ नामाकरण गरिएको उक्त अभ्यास भदौ २४ सम्म चल्ने सेनाले जनाएको छ ।

नेपाली सेनाको विशेष बाहिनी महाराजगन्जमा औपचारिक रूपमा सैन्य अभ्यास सुरु भएको हो । उक्त अभ्यास भक्तपुरको नगरकोटमा समेत गर्ने सेनाको तयारी छ । सैन्य अभ्यासमा दुवै देशका महासेनानीको नेतृत्वमा २२ \२२ जना सहभागी छन्।

सैन्य अभ्यास प्रतिआतंकवाद युद्धकला, विपद् व्यवस्थापनलगायत विषयमा केन्द्रित छ। दुवै देशका सेनाले २०७४ देखि सैन्य अभ्यास गर्दै आएका छन्।