साउनदेखि आजसम्म ४ सचिवसहित ४६४ कर्मचारीले दिए राजीनामा

१० कात्तिक, काठमाडौं । चालु आर्थिक वर्ष २०८३/८४ सुरु भएयता ४ सचिवसहित ४६४ जना निजामती कर्मचारीले पदबाट राजीनामा दिएका छन्। राष्ट्रिय किताबखाना (निजामती) का अनुसार गत साउन १ गतेदेखि कात्तिक १० गतेसम्म विभिन्न तहका कर्मचारीले राजीनामा दिएका हुन्।

किताबखानाका अनुसार राजीनामा दिनेमा २०७ जना राजपत्राङ्कित र २५७ जना राजपत्र अनङ्कित कर्मचारी रहेका छन्। राजीनामा दिने राजपत्राङ्कित कर्मचारीमध्ये ४ जना सचिव, ३३ जना सहसचिव, ७२ जना उपसचिव र ९८ जना शाखा अधिकृत तहका छन्। त्यस्तै, राजपत्र अनङ्किततर्फ १३७ जना खरिदार तथा नायब सुब्बा तहका र १२० जना श्रेणीविहीन कर्मचारीले राजीनामा दिएका छन्।

सरकारले प्रतिनिधिसभामा दर्ता गरेको निजामती कर्मचारी विधेयकमा प्रस्ताव गरिएको व्यवस्थासँगै कर्मचारीको राजीनामाको विषय चर्चामा आएको छ। विधेयकमा व्यवस्था भएअनुसार कार्यान्वयनमा आउने समयमा पहिलो पटक ३० वर्ष सेवा अवधि पूरा गरेका वा ५५ वर्ष उमेर पुगेका कर्मचारीले राजीनामा दिनुपर्ने प्रावधान प्रस्ताव गरिएको छ। राजीनामा दिएका सबै ४६४ कर्मचारीको राजीनामा सरकारले स्वीकृत गरिसकेको राष्ट्रिय किताबखानाले जनाएको छ।