नेपाली कांग्रेसको झण्डा बोक्ने सिन्धुलीका ४ शिक्षक कारबाहीमा

५ असोज, काठमाडाैँ । शिक्षा तथा खेलकुद मन्त्रालयले राजनीतिक गतिविधिमा संलग्न शिक्षकलाइ कारवाही गर्ने भएको छ । शिक्षक राजनीतिक गतिविधिमा लागेको विषय सामाजिक सन्जालबाट हाहिरिएपछि शिक्षामन्त्री सस्मित पोखरेलले कुनैपनि राजनीतिक गतिविधिमा संलग्न हुने शिक्षकलाई कारवाही गर्न निर्देशन दिएका छन । उनले देशभरका विद्यालयमा शिक्षकको राजनीतिक गतिविधिलाइ निगरानी गर्न पनि निर्देशन दिएका छन ।

यसैबीच सिन्धुलीका चार जना शिक्षक तथा कर्मचारी नेपाली कांग्रेसको गतिविधिमा सक्रिय रूपमा संलग्न भएको पाइएपछि उनीहरूमाथि कारबाही गर्न सिफारिस गरिएको छ। शिक्षा विकास तथा समन्वय एकाइ, सिन्धुलीले जिल्लाका सामुदायिक विद्यालयमा कार्यरत शिक्षक तथा कर्मचारी राजनीतिक दलका कार्यक्रम तथा गतिविधिमा सहभागी भएको जानकारी प्राप्त भएको भन्दै सम्बन्धित स्थानीय तहलाई कारबाही प्रक्रिया अघि बढाउन निर्देशन दिएको हो।

एकाइले दुधौली नगरपालिका, सुनकोशी गाउँपालिका र तीनपाटन गाउँपालिकालाई पत्राचार गर्दै ती स्थानीय तहअन्तर्गत कार्यरत चार जना शिक्षक तथा कर्मचारी राजनीतिक गतिविधिमा संलग्न रहेको जनाएको छ।

एकाइ प्रमुख तथा उपसचिव दिनेशप्रसाद देवकोटाले जारी गरेको पत्रमा सामाजिक सञ्जाललगायत विभिन्न माध्यमबाट प्राप्त सामग्रीका आधारमा उनीहरूको राजनीतिक गतिविधिमा संलग्नता देखिएको उल्लेख छ।

कारबाही सिफारिस गरिएकामा प्रेमप्रसाद भट्टराई, सर्वेश्वर कोइराला, अर्जुनकुमार गौतम र यतिराज तिमल्सिना रहेका छन् । भट्टराई कांग्रेसका पूर्व महाधिवेशन प्रतिनिधि समेत हुन ।   एकाइका अनुसार शिक्षक तथा कर्मचारीले राजनीतिक दलका कार्यक्रममा सक्रिय रूपमा सहभागी हुनु शिक्षा नियमावली, २०५९ (दशौँ संशोधनसहित) मा उल्लिखित व्यवस्थाविपरीत हुन्छ।

त्यसैले सम्बन्धित शिक्षक तथा कर्मचारीमाथि प्रचलित कानुनबमोजिम आवश्यक कारबाही गर्न तीनवटै स्थानीय तहलाई अनुरोध गरिएको छ। साथै, सम्बन्धित शिक्षक तथा कर्मचारीमाथि गरिएको कारबाहीबारे शिक्षा विकास तथा समन्वय एकाइलाई अविलम्ब जानकारी गराउनसमेत पत्रमा भनिएको छ। पत्रको बोधार्थ शिक्षा तथा खेलकुद मन्त्रालयअन्तर्गतको शिक्षा विभागलाई समेत दिइएको छ।

यसैबीच यसैबिच शिक्षा विकास तथा समन्वय एकाइ, बैतडीले जिल्लाका विद्यालयमा कार्यरत शिक्षकहरूको राजनीतिक दलका कार्यक्रममा सहभागिताबारे निगरानी गर्न स्थानीय तहहरूलाई निर्देशन दिएको छ।

एकाइले जिल्लाका १० वटै स्थानीय तहलाई पत्राचार गर्दै सामाजिक सञ्जालमा सार्वजनिक भएका समाचार तथा सूचनाअनुसार केही विद्यालयका शिक्षकहरू विभिन्न राजनीतिक दलका कार्यक्रममा सहभागी भएको पाइएको जनाएको छ।

पत्रमार्फत स्थानीय तहअन्तर्गतका विद्यालयमा कार्यरत शिक्षकहरू राजनीतिक दलका विभिन्न कार्यक्रममा सहभागी भए/नभएको सम्बन्धमा गहन निगरानी गर्न अनुरोध गरिएको छ।
त्यसैगरी, प्रचलित शिक्षा ऐन तथा नियमावलीले निर्धारण गरेको शिक्षक आचरण र मापदण्ड तथा नेपाल सरकारका पछिल्ला निर्देशनविपरीत कुनै शिक्षकका गतिविधि पाइएमा प्रचलित कानूनबमोजिम आवश्यक कारबाही गर्नसमेत एकाइले स्थानीय तहहरूलाई आग्रह गरेको छ।

शिक्षा विकास तथा समन्वय एकाइ, बैतडीका एकाइ प्रमुख दशरथ दत्त भट्टद्वारा जारी पत्रमा उक्त निर्देशन उल्लेख गरिएको छ। पत्रको बोधार्थ शिक्षा तथा खेलकुद मन्त्रालयलाई समेत दिइएको छ।