नेपाल टेलिकमले माग्यो धितोपत्र दलाल सेवाका लागि सूचीकरण प्रस्ताव

८ भदाै, काठमाडाैं । नेपाल दूरसञ्चार कम्पनी लिमिटेड (नेपाल टेलिकम) ले आर्थिक वर्ष २०८३/८४ का लागि धितोपत्र दलाल (स्टक ब्रोकर) सेवा लिन इच्छुक कम्पनीहरूबाट सूचीकरणका लागि प्रस्ताव आह्वान गरेको छ । टेलिकमले आफ्नो धितोपत्र सम्बन्धी कारोबारका लागि योग्य दलाल सेवा प्रदायकहरूको सूची तयार गर्ने उद्देश्यले यो सूचना जारी गरेको हो ।

सूचना अनुसार, योग्यता पुगेका इच्छुक धितोपत्र दलाल कम्पनीहरूले यो सूचना प्रथम पटक प्रकाशित भएको मिति (भदौ ८ गते) ले १५ दिनभित्र कार्यालय समयमा टेलिकमको भद्रकालीस्थित केन्द्रीय कार्यालयमा सूचीकरण प्रस्ताव दर्ता गराउनु पर्नेछ । सूचीकरणका लागि आवश्यक प्रस्ताव फाराम कम्पनीबाट निःशुल्क प्राप्त गर्न सकिने टेलिकमले जनाएको छ ।

प्रस्ताव पेश गर्ने कम्पनीहरूका लागि टेलिकमले विभिन्न योग्यता र शर्तहरू तोकेको छ । जसअन्तर्गत, कम्पनी प्रचलित कानुन बमोजिम दर्ता भएको, नेपाल धितोपत्र बोर्डबाट अनुमति प्राप्त गरी नवीकरण गरेको र स्थायी लेखा नम्बर प्राप्त गरेको हुनुपर्नेछ । त्यसैगरी, नेपाल धितोपत्र बोर्डले तोकेको न्यूनतम चुक्ता पूँजी पुगेको, आर्थिक वर्ष २०८१/८२ को नेट वर्किङ क्यापिटल धनात्मक भएको र सोही वर्षको कर चुक्ता गरेको हुनुपर्ने योग्यता तोकिएको छ ।

त्यसैगरी, अन्तिम दुई आर्थिक वर्ष २०८०/८१ र २०८१/८२ मा धितोपत्र खरिद-बिक्रीको औसत वार्षिक कारोबार रकम १० अर्ब रुपैयाँभन्दा बढी भएको हुनुपर्नेछ । धितोपत्र दलालका रूपमा कम्तीमा दुई वर्ष काम गरेको अनुभव पनि आवश्यक पर्नेछ ।

सूचीकरणका लागि कम्तीमा एउटा पूर्ण वा आंशिक सरकारी स्वामित्व भएको कम्पनी, संगठित संस्था वा अन्य संगठित संस्थामा धितोपत्र दलालका रूपमा कम्तीमा एक वर्ष काम गरेको अनुभवसमेत हुनुपर्ने टेलिकमले जनाएको छ।