शिक्षामन्त्रीलाइनै आक्रमण गर्ने कांग्रेसकाे तयारी, भिडन्त रोक्न सय जना मर्यादा पालक संसदमा

११ माघ,काठमाडाैं । प्रतिनिधिसभाको आजको बैठकमा भिडन्तको संभावना देखेपछि बैठक कक्षमै सयजना मर्यादापालक खटाइने भएको छ ।  सत्तारुढ नेकपा जसरी पनि संसद्मा चिकित्सा शिक्षा विधेयक पारित गर्ने र प्रमुख प्रतिपक्षी कांग्रेस प्रस्तुत गर्नै नदिने योजनामा लागेपछि आजको बैठकमा भिडन्तको संभावना रहेको छ ।

कांग्रेसले बिद्येयक रोक्न जस्तोसुकै कदम चाल्ने भन्दै सांसदलाई आवश्यक परे भिडन निर्देशन दिइसकेको छ । गत सोमबार र मंगलबारका ५ बैठक कांग्रेसको अवरोधका कारण कार्यसूची प्रस्तुत हुन नपाई स्थगित भएपछि आज दिउँसो १ बजेका लागि अर्को बैठक आह्वान भएको छ ।

शुक्रबार नेकपा जसरी पनि विधेयक प्रस्तुत गर्ने रणनीतिमा छ । तर, कांग्रेस जुनकुनै हालतमा रोक्ने योजनामा छ । मंगलबार नै धकेलाधकेलको अवस्थामा पुगेको तनाव शुक्रबार थप बढ्ने संकेत दुवै पक्षका सांसदहरूले दिएका छन् । दुवै पक्षको मुठभेडको तयारीलाई मध्यनजर गर्दै संसद् सचिवालयले शुक्रबारको बैठकमा मर्यादापालकसमेत थपेको छ । हाल एक सय ३१ मर्यादापालक रहेकामा ३० जना थप्ने भएको हो ।

संसद् बैठकमै सय मर्यादापालक खटाइनेछन् । ‘आवश्यक परे ३० जनाजतिको संख्यामा प्रहरी हेडक्वार्टरबाट मगाउनेछौँ । यसअघि मंगलबारको तेस्रो बैठक बस्ने वेलामा पनि एक सय ३१ बाहेक अन्य ३० जनालाई हामीले तयारी अवस्थामा राखेका थियौँ,’ सचिवालयको भनाई छ । सचिवालयले आवश्यक परे रोस्ट्रमअघि मर्यादापालकको डबल रो राखिने जनाएको छ ।

संसदको प्रक्रियामा गइसकेकाले विधेयक अब फिर्ता नहुने र परिमार्जन पनि नगर्ने अडानमा नेकपा छ । कांग्रेसले भने सभामुख कृष्णबहादुर महराको भूमिका पार्टी नेताकोजस्तो भएकाले माफी नमागेसम्म संसद चल्न नदिने अर्को अडान थपेको छ ।

यसअघि उसले आफ्ना पूर्वसभापतिहरू गिरिजाप्रसाद कोइराला र सुशील कोइरालाको नाममा रहेका अस्पताल संघीय सरकार मातहत गठन आदेश नदिएकोमा संसद अवरुद्ध गर्दै आएको छ । कांग्रेस सांसदहरुले चिकित्शा बिद्येयक प्रस्तुत गर्न खोजे भिडन्त हुने बताइसकेका छन ।