आफ्नै निवासमा नेविसंघका कार्यकर्ताबाट घेरिए कांग्रेस सभापति देउवा

३ माघ, काठमाडौँ  । माघ २ गतेबाट सकिएको नेवि संघ केन्द्रिय समितिको कार्यकाल थप गरेकोमा नेविसंघका कार्यकर्ताबाट आफ्नै निवासमा  कांग्रेस सभापति शेरबहादुर देउवा घेराउमा परेका छन् ।

मोटरसाइकल र्‍यालीसहित देउवा निवास बुढानीलकण्ठ पुगेका नेपाल विद्यार्थी संघ (नेविसंघ)का नेता–कार्यकर्ताहरुले विरोध गर्दै कांग्रेस सभापति  देउवाको निवासमा  धर्ना  दिएका हुन् ।

नेवि संघका नेताहरु दिपक भट्टराई, बामदेव अधिकारी, मनोज बैद्य, प्रदिप शर्मा, भोला नेपाललगायत काठमाडौं उपत्यका भित्रका क्याम्पस इकाइ सभापति, स्ववीयू सभापति साथै नेता–कार्यकर्ताहरु देउवा निवास पुगेका थिए ।

विद्यार्थी भीड बढेपछि देउवा निवासमा सुरक्षा व्यवस्था कडा बनाइएको थियो । धर्नामा पुगेका विद्यार्थी नेता कार्यकताहरु अधिकांश पार्टीका बरिष्ठ नेता रामचन्द्र पौडेल निकटका छन् ।

विधानअनुसार बुधबार राति १२ बजेपछि नेविसंघको म्याद सकिएको छ ।  तर तत्कालका लागि सोही कार्यसमितिलाई निरन्तरता दिएको बताइन्छ । देउवालेआफूले छिट्टै निर्णय लिने वचन दिएका छन् ।