एनआईसी एसिया डाइनामिक डेप्ट फन्डको नगद लाभांश इकाइधनीहरुको बैंक खातामा जम्मा

२२ भदाै, काठमाडाैं । एनआईसी एसिया डाइनामिक डेप्ट फन्डले आफ्ना इकाइधनीलाई नगद लाभांश वितरण गर्न सुरु गरेको छ । फन्डले भदौ १७ गतेबाटै इकाइधनीहरुको सम्बन्धित बैंक खातामा नगद लाभांश पठाउन सुरू गरेकाे हाे ।

योजना व्यवस्थापक एनआईसी एसिया क्यापिटलले आज एक सूचना प्रकाशित गरी उक्त योजनाको आर्थिक वर्ष २०७९/८०का लागि घोषित करसहित १० प्रतिशत नगद लाभांश इकाइधनीहरुको बैंक खातामा जम्मा गरिएको जानकारी दिएकाे छ । हालसम्म डिम्याट खातामा बैंक खाता अद्यावधिक नगराएका इकाइधनीहरुलाई खाता अद्यावधिक गराउन योजना व्यवस्थापक एनआईसी एसिया क्यापिटलले अनुराेध गरेकाे छ ।

यस म्युचुअल फन्डको पुनः लगानीमा सहभागी हुन यसअघि नै आवेदन दिने सम्पूर्ण इकाइधनीहरुलाई सो योजनाअन्तर्गत प्राप्त थप इकाइ सम्बन्धित इकाइधनीको हितग्राही खातामा निकट भविष्यमा जम्मा गरिने पनि क्यापिटलले जनाएको छ।