एक क्विन्टल गाँजा सहित दुईजना पक्राउ

२० फागुन, चितवन । चितवनमा जिल्ला वन कार्यालयको सहयोगमा प्रहरीले एक क्विन्टल गाँजासहित दुईजनालाई पक्राउ गरेको छ ।

प्रहरी नायब उपरीक्षक प्रभुप्रसाद ढकालका अनुसार गएराति राप्ती नगरपालिका– ११ आँपपानीबाट करिब एक क्विन्टल गाँजा बरामद गरिएको थियो ।
सामुदायिक वनमा काठ चोरी हुने गरेको सूचनाको आधारमा निगरानीका लागि गएको टोलीले गाँजा फेला पारेको हो ।

डिजिटारबाट भण्डारातर्फ आउँदै गरेको ना१ह ९१०० नंको अटोलाई चेक गर्ने क्रममा उक्त परिमाणको गाँजा फेला परेको टोलीले बताएको छ । टोलीलाई देख्नासाथ अटोमा रहेका दुईजना भागेको र अन्य दुईजनालाई नियन्त्रणमा लिएर वनको टोलीले प्रहरीलाई बुझाएको थियो ।

पक्राउ पर्नेमा राप्ती नगरपालिका– ४ का २५ वर्षीय राजन तामाङ र ३७ वर्षीय कुमार तामाङ रहेका छन् । दुवैजनालाई लागुऔषध ऐनअन्तर्गत मुद्दा दर्ता गरी कारबाही अगाडि बढाइने ढकालले बताए ।