पत्रकार महासंघका १२ एसोसिएट संस्थाका संस्थापक सम्मानित

२२ फागुन, काठमाडाैँ । नेपाल पत्रकार महासँघ एसोसिएट प्रदेशले महासँघमा आवद्द १२ वटा संस्थाका संस्थापक अध्यक्षहरुलाई सम्मान गरेको छ।

विधागत संस्था स्थापनागरि नेपाली पत्रकारीता क्षेत्रमा विधागत पत्रकारीताको विस्तार र विकासमा योगदान पूर्याएकोमा १२ संस्थाका संस्थापक अध्यक्षहरुलाई सम्मान गरेको हो।

संस्थापक अध्यक्षहरु चलचित्र समीक्षक समाज नेपालका रमण घिमिरे, र पत्रकारिता विकास समाजका केदार खड्का, दक्षिण एसियाली खेलकुद पत्रकार संघका स्वर्गिय ईश्वर मान सिंह, पत्रकारिता अनुसन्धान तथा तालिम समाज – श्री आचार्य, एभरेष्ट प्रेस क्लबका शिवप्रसाद खड्का, नेपाल पत्रकार मञ्चका वैकुण्ठ प्रसाद भण्डारी, कार्टुनिष्ट क्लब नेपालका अशोकमान सिंह, नेपाल चलचित्र पत्रकार संघका भरत शाक्य, पर्यटन पत्रकार मञ्चका विद्रोही गिरीलाई सम्मान गरिएको थियो।

यसैगरी अनलाइन पत्रकार संघ नेपालका केपी ढुंगाना, नेपाल खेलकुद पत्रकार मञ्चका सीताराम अग्रहरी र फोटो जर्नालिष्ट क्लबका चन्द्रशेखर कार्कीलाई सम्मान पत्र र दोसल्ला ओढाएर सम्मान गरिएको थियो। सम्मान कार्यक्रममा बोल्दै नेपाल पत्रकार महासँघका गोविन्द आचार्यले अग्रजहरुको सम्मान गर्ने परम्पराको प्रारम्भ गरेकोमा आयोजकलाई धन्यवाद दिए।

उनले महासँघ निर्वाचन मार्फत नयाँ नेतृत्वको चयनको चरणमा प्रवेश गरिसकेको भन्दै निर्वाचनको समयमा जुन विचार समूहबाट उम्मेद्वार बने पनि नेतृत्वमा पुगेपछि उनीहरूसँगै लड्ने साहस बोक्नुपर्ने बताए।

निर्वाचनको बेलामा वैचारिक आधारमा प्रतिष्पर्धा गरिएपनि निर्वाचित भएपछि महासँघको उदेश्यमा क्रियशिल हुनुको अर्को विकल्प नहुने भन्दै उनले भने’ निर्वाचनको बेला जसको टिकट लिएर निर्वाचित भए पनि त्यसपछि प्रेस स्वतन्त्रता र श्रमजीवीको हक रक्षाका लागि तीनै टिकट दिने विरुद्ध उभिन सक्नेले मात्र महासँघको नेतृत्वमा जाने अभ्यास गर्नुहोला।’

महासँघका उपाध्यक्ष विपुल पोखरेलले पहिलो पटक महासँघ प्रत्यक्ष निर्वाचन प्रणालीमा गएको र अबको निर्वाचन हिजोको जस्तो कुनै समूह विशेषको मात्र दवदवा हुन नसक्ने बताए।

नेपाल प्रेस युनियनका महासचिव अजयबाबु सिवाकोटीले महासँघको निर्वाचनै हुन नदिने खेल भइरहेकाले सबै पत्रकार एक ठाउँमा उभिएर त्यसको प्रतिवाद गर्नुपर्ने बताए।

एसोसिएट प्रदेशका अध्यक्ष केपी ढुंगानाले महाँघको निर्वाचनमा दलगत निकटताभन्दा सञ्चारकर्मीले विवेक प्रयोग गरे महासँघको नेतृत्वमा आउन बालुवाटार, पेरिसडाँडा र बुढानिलकण्ठ धाउने काम भोलीका दिनमा बन्द हुने बताए।

एसोसिएट संस्थाहरुको तर्फबाट बोल्दै समिक्षक समाजका अध्यक्ष यज्ञशले महासँघमा विधागत प्रतिनिधित्व बढाउनुपर्नेमा जोड दिएका थिए। केवल निर्वाचनको बेलामा मात्र भेला गर्नेक्रम हटाउनुपर्नेमा उनको जोड थियो।

सम्मानित संस्थापक अध्यक्षहरुको तर्फबाट बोल्दै रमण घिमिरेले महासँघलाई सञ्चारकर्मीहको साझा थलो बनाउन जोड दिएका थिए।