अयोध्यामा राम मन्दिर बन्ने भएपछि जनकपुरमा दीपावली

२४ कात्तिक, जनकपुर । भारतको अयोध्यामा राम मन्दिर बन्ने भएपछि प्रदेश २ को जनकपुरमा  दीपावली गरिएको छ । अयोध्याको उक्त विवादास्पद जमिनमा राम मन्दिर बन्ने भएपछि भगवान् रामको ससुराली मानिने जनकपुरमा दीपावलीसहित खुसीयाली मनाइएको हो ।

भारतको सर्वोच्च अदालतले वर्षौंदेखि विवादास्पद जमिनलार्ई राम मन्दिरको पक्षमा शनिबार फैसला सुनाएपछि विश्व हिन्दु परिषद् धनुषाले जानकी मन्दिरमा दीप प्रज्ज्वलन गरेको हो । सोही क्रममा मन्दिरमा साधुसन्तहरुलाई मिठाइसमेत बाँडिएको थियो ।

विवाह पञ्चमी आउनमा केही दिन बाँकी रहेको अवस्थामा राम मन्दिर बन्ने पक्षमा निर्णय आउनु सुखद मान्न सकिन्छ ।