दशैं–तिहारमा टेलिकमको ग्राहकलाई छुटको बहार, १३ महिनासम्म इन्टरनेटदेखि सस्तो मोबाइल प्याकेजसम्म

२५ असोज, काठमाडौँ । दशैं, तिहार र छठलाई लक्षित गर्दै नेपाल टेलिकमले ग्राहकका लागि इन्टरनेटदेखि मोबाइल डाटा, भ्वाइस र सन्देश सेवासम्मका विभिन्न सहुलियत योजना सार्वजनिक गरेको छ। ‘दशैं–तिहार अफर २०८३’ नाम दिइएको योजनामा नयाँ फाइबर इन्टरनेट जडान गर्ने ग्राहकदेखि मोबाइल सेवा प्रयोगकर्तासम्मलाई लक्षित गरी छुट र बोनसको व्यवस्था गरिएको छ।

टेलिकमले असोज २५ गतेदेखि कात्तिक ३० गतेसम्म नयाँ फाइबर टु द होम प्याकेज जडान गर्ने ग्राहकबाट लिँदै आएको ५०० रुपैयाँ जडान शुल्क नलिने भएको छ। यस अवधिमा नयाँ फाइबर सेवा जोड्ने ग्राहकले प्रारम्भिक जडानमै उक्त रकम बराबरको छुट पाउनेछन्।

वार्षिक इन्टरनेट प्रयोग गर्ने ग्राहकका लागि पनि टेलिकमले अतिरिक्त सेवा अवधि थप गरेको छ। १००, १५० र २०० एमबिपिएस क्षमताका नयाँ वार्षिक प्याकेज खरिद गर्ने ग्राहकले १२ महिनाको शुल्क तिरेर १३ महिनासम्म इन्टरनेट चलाउन पाउनेछन्।

थप एक महिनाको सेवा बोनसका रूपमा उपलब्ध हुनेछ भने प्याकेजसँग प्राप्त हुने मोबाइल डाटाको सुविधा पनि १३ महिनासम्म कायम रहनेछ। टेलिकमको भर्चुअल सेट–टप बक्ससहितको प्याकेजमा यसअघि नै एक हजार रुपैयाँ छुटको व्यवस्था रहेको कम्पनीले जनाएको छ। यससँगै चाडपर्वलाई लक्षित गरी मोबाइल सेवातर्फ पनि विभिन्न मूल्यका डाटा प्याकेज सार्वजनिक गरिएको छ।

जिएसएम मोबाइल प्रयोगकर्ताका लागि ४९९ रुपैयाँमा ‘फेस्टिभल अनलिमिटेड’ प्याकेज उपलब्ध हुनेछ। यस प्याकेजमा दैनिक पाँच जिबीसम्म उच्चगतिको डाटा प्रयोग गर्न सकिनेछ। पाँच जिबीको सीमा पूरा भएपछि पनि प्याकेजको बाँकी अवधिभर दुई एमबिपिएस गतिमा असीमित डाटा चलाउन सकिने व्यवस्था गरिएको छ।

त्यस्तै, ६९९ रुपैयाँमा ‘फेस्टिभल अनलिमिटेड प्रिमियम’ प्याकेज लिन सकिनेछ। यसमा दैनिक १० जिबीसम्म उच्चगतिको डाटा उपलब्ध हुनेछ। उक्त सीमा सकिएपछि बाँकी अवधिमा तीन एमबिपिएस गतिमा असीमित डाटा प्रयोग गर्न सकिने टेलिकमले जनाएको छ।

डाटा प्रयोगसँगै फोन कल र सन्देशका लागि पनि टेलिकमले छुट्टै प्याकेज ल्याएको छ। २०० रुपैयाँमा सबै नेटवर्कमा प्रयोग गर्न सकिने एक हजार मिनेटको ‘जोयफुल मिनेट्स’ प्याकेज उपलब्ध हुनेछ। यसले विभिन्न दूरसञ्चार सञ्जालमा फोन गर्नुपर्ने ग्राहकलाई लक्षित गरेको छ।

सन्देश सेवाका लागि भने ९९ रुपैयाँमा आफ्नै नेटवर्कभित्र एक हजार एसएमएस पठाउन सकिने ‘फेस्टिभ म्यासेज’ प्याकेज ल्याइएको छ। डाटा, भ्वाइस र सन्देशतर्फ उपलब्ध गराइएका यी मोबाइल प्याकेजको अवधि ३० दिनको हुनेछ।

टेलिकमका अनुसार चाडपर्व लक्षित यी मोबाइल प्याकेज कात्तिक ३० गतेसम्म खरिद गर्न सकिनेछ। ग्राहकले सेवा लिनका लागि मोबाइलबाट ८१४१५८११३ डायल गर्न सक्नेछन् भने नेपाल टेलिकमको मोबाइल एपमार्फत पनि आफूलाई आवश्यक प्याकेज छनोट गरेर खरिद गर्न सक्नेछन्।

यस वर्षको चाडपर्वलाई लक्षित गरी ल्याइएको योजनाले घरको इन्टरनेटदेखि मोबाइल डाटा, फोन कल र सन्देशसम्मका दैनिक आवश्यकतालाई एउटै अफरअन्तर्गत समेटेको छ। विशेषगरी वार्षिक फाइबर प्याकेजमा एक महिना थप सेवा र मोबाइलतर्फ असीमित प्रयोगको सुविधा राखिएपछि चाडपर्वको समयमा टेलिकमका ग्राहकलाई अतिरिक्त लाभ पुग्ने कम्पनीको अपेक्षा छ।