शाओमीले नेपालमा सार्वजनिक गर्‍यो नयाँ स्मार्ट घडी

१९ साउन, काठमाडौं । विश्वप्रसिद्ध प्रविधि कम्पनी शाओमीले नेपाली बजारमा नयाँ स्मार्ट घडी शाओमी वाच एस फोर ४१ मिलिमिटर सार्वजनिक गरेको छ। आकर्षक डिजाइन, लामो ब्याट्री क्षमता, उन्नत स्वास्थ्य निगरानी तथा खेलकुदसम्बन्धी स्मार्ट सुविधासहितको यो घडी बजारमा ल्याइएको कम्पनीले जनाएको छ।

कम्पनीका अनुसार नयाँ स्मार्ट घडीमा १.४८ इन्चको एमोलेड डिस्प्ले रहेको छ। यसमा ४८० × ४८० पिक्सेल रिजोलुसन, ३२३ पिक्सेल प्रतिइन्च घनत्व तथा २ हजार ५०० निट्ससम्मको उज्यालोपन भएकाले घाममा पनि स्पष्ट रूपमा प्रयोग गर्न सकिन्छ। स्टेनलेस स्टिलको फ्रेम, विभिन्न बेजेल र स्ट्र्यापका विकल्प तथा करिब ४६ ग्राम तौलका कारण घडी हलुका र प्रयोग गर्न सहज रहेको कम्पनीले जनाएको छ।

यसमा ४८६ मिलिअम्पियर–घण्टा क्षमताको ब्याट्री रहेको छ, जसले सामान्य प्रयोगमा एकपटकको चार्जमै अधिकतम २१ दिनसम्म साथ दिने कम्पनीको दाबी छ।

स्वास्थ्य निगरानीका लागि घडीमा मुटुको धड्कन, रगतमा अक्सिजनको मात्रा, निद्रा तथा अन्य स्वास्थ्य सूचक मापन गर्ने सुधारिएका सेन्सर र प्रणाली समावेश गरिएको छ। साथै, साप्ताहिक तथा मासिक निद्रा प्रतिवेदन र निद्रासम्बन्धी विश्लेषण सुविधाले प्रयोगकर्तालाई आफ्नो स्वास्थ्य अवस्थाबारे थप जानकारी उपलब्ध गराउने कम्पनीले जनाएको छ।

खेलकुदका लागि घडीमा १५० भन्दा बढी खेल तथा व्यायाम मोड, दोहोरो आवृत्तियुक्त वैश्विक भू–उपग्रह नेभिगेसन प्रणाली, तथा साइकल यात्राका क्रममा मोबाइल फोनसँग जोडिने वास्तविक समयको ड्यासबोर्ड सुविधा रहेको छ। साथै, ताली बजाउने, हात हल्लाउने वा मुट्ठी कस्ने जस्ता हातका गतिविधि पहिचान गरी मुटुको धड्कन, खर्च भएको क्यालोरी र अन्य विवरण अभिलेख राख्ने सुविधा पनि उपलब्ध छ।

घडीमा ब्लुटुथ ५.४, नजिकको सम्पर्कमार्फत हुने भुक्तानी प्रविधि (एनएफसी) तथा ५ एटीएमसम्मको पानी प्रतिरोधी क्षमता रहेको कम्पनीले जनाएको छ। कम्पनीका अनुसार शाओमी वाच एस फोर ४१ मिलिमिटर को नेपाली बजार मूल्य ३९ हजार ९९९ रुपैयाँ तोकिएको छ।