त्रिशूलीमा ट्रक खस्यो, तीन जनाको उद्धार

४ मंसिर, काठमाडौँ । पृथ्वी राजमार्गअन्तर्गत् धादिङमा मंगलबार बिहान ५:५५ बजे  एउटा ट्रक त्रिशूली नदीमा खसेको छ।

नवलपरासीबाट काठमाडौंतर्फ आउँदै गरेको लु २ ख २५० नम्बरको ट्रक रोराङ गाउँपालिका–१० खयरघारीमा त्रिशूली नदीमा खसेको जिल्ला प्रहरी कार्यालय धादिङले जनाएको छ । उक्त दुर्घटनामा परेका तिनजनाको उद्धार गरिएको छ।

ट्रक धनी खैरहनी नगरपालिका ४६ वर्षीय सुरेश गुरुङ, नवलपरासी पश्चिमका २७ वर्षीय ट्रक चालक आशिष महतो र सहचालक २६ वर्षीय राजु थापामगरलाई प्रहरीले उद्धार गरेको हो।

ट्रक भने नदीमै रहेको र ट्रकमा रहेको सामान तथा ट्रक निकाल्ने प्रयास गरिरहेको प्रहरीले बताएको छ।

ट्रक आफैं अनियन्त्रित भई दुर्घटना भएको र उद्धार गरिएकाहरूको अवस्था सामान्य रहेको प्रहरीले बताएको छ ।

उनीहरूको उपचारका लागि चितवन पठाइएको पनि प्रहरीले बताएको छ।