कमलामाई र दूधौली नगरद्वारा बाढीपहिरो प्रभावित पालिकालाई आर्थिक सहयोग

१९ असोज, सिन्धुली । सिन्धुलीका बाढीपहिरो प्रभावित पालिकालाई राहत तथा सहयोग जुट्न थालेको छ । यही असोज १० र १२ गते अविरल वर्षाले क्षति पुर्याएको दुई पालिकालाई विभिन्न निकायले सहयोग गर्न थालेका हुन् ।

बाढीपहिरोजन्य विपद्बाट पुगेको क्षति पुनःस्थापन तथा सङ्कट व्यवस्थापन गर्न आर्थिक सहयोग गर्न सुनकोशी गाउँपालिका र गोलञ्जोर गाउँपालिकालाई सहयोग जुट्न थालेकोे हो । कमलामाई नगर नगरप्रमुख उपेन्द्रकुमार पोखरेलले गोलञ्जोर र सुनकोशीका गाउँपालिका अध्यक्ष क्रमशः शङ्करराज बराल र दीपा बोहोरा दाहाललाई तीन÷तीन लाखको हस्तान्तरण गर्नुभयो ।

सो अवसरमा नगरप्रमुख पोखरेलले आर्थिक सहयोगले पनि सुनकोसी र रोशी खोलामा आएको बाढी र विभिन्न ठाउँमा गएको पहिरोका कारण विस्थापित भएका प्रभावित परिवारलाई मलमको काम गर्ने बताउनुभयोे । “बाढीपहिरोबाट सिन्धुलीका सबै पालिका प्रभावित छन् । अझ बढी उत्तरी क्षेत्रका सुनकोसी, गोलञ्जोर र फिक्कल गाउँपालिका प्रभावित भएको छ्,” उहाँले भन्नुभयो, “छिमेकीकोमा विपत्ति आयो, मेरोमा आएन भनेर चप लागेर नबसाैँ । आ–आफ्नो ठाउँबाट सबैले सकेको सहयोग गरौँ ।” बाढीपहिरोले घरमा थुपारेको लेदो र बालुवा माटो सफाइ गर्न जनशक्तिसमेत प्रभावित क्षेत्रमा खटाइएको उहाँले बताउनुभयो ।

यसैगरी, दूधौली नगरप्रमुख दिनेशकुमार अधिकारी दनुवारले सुनकोसी गाउँपालिकालाई रु पाँच लाख र गोलञ्जोर गाउँपालिकालाई रु दुई लाख प्रदान गर्नुभएको छ । दूधौली नगरकार्यपालिका र विपद् व्यवस्थापन समितिको बैठकले गरेको निर्णय अनुसारसम्बन्धी पालिकाको कार्यालय पुगेर पालिका प्रमुखलाई सहयोग रकम प्रदान गरिएको नगरप्रमुख अधिकारी दनुवारले बताउनुभयो ।

मरिण गाँउपालिकाले सुनकोशी गाउँपालिकालाई तीन लाख र गोलञ्जोर गाउँपालिकालाई दुई लाख सहयोग गरेको छ । मरिणका प्रमुख विमर्श मोक्तानले सम्बन्धित पालिका पुगेर उक्त सहयोग प्रदान गर्नुभएको थियो । यसका साथै सिन्धुली उद्योग वाणिज्य सङ्घ, सिन्धुली नेपाल रेडक्रस सोसाईटीलगायत जिल्लामा क्रियाशील विभिन्न स्घसंस्थाले राहत वितरण कार्यदलका संयोजकसमेत रहेका सहायक प्रमुख जिल्ला अधिकारी कृष्णमणि फुयाँलको संयोजकत्वमा बाढीपहिरो प्रभावित पालिकाका तीन सय परिवारलाई तत्कालका लागि चाहिने अत्यावश्क सामग्री तथा खाद्यन्नहरु वितरण गरेका छन् ।

विभिन्न ठाउँमा गएको पहिरो र रोशी खोला तथा सुनकोसी नदीमा आएको बाढीले यस पालिकामा मानवीय क्षतिसमेत भएको थियो । मानव बस्ती, धानबाली, खेतीयोग्य जमिन र सडकमा क्षति बाढीपहिरोले गरेको थियो । बाढीपहिरो प्रभावित सुनकोसी र गोलञ्जोरले सूचना निकालेर पालिकावासीको उद्धार, राहत, पुनःनिर्माण र पुनःस्थापनाको लागि सहयोग गर्न सार्वजनिक अपिल गरेका थिए ।