सीता ग्यास लिक हुँदा जलेर घाइते भएका नुवाकोटका राजकुमार लोप्चनको निधन

१९ भदौ, नुवाकोट। सीता ग्यास लिक भएर जलेका नुवाकोटका एक युवाको सोमबार उपचारको क्रममा कीर्तिपुरमा निधन भएको छ । कीर्तिपुरको वर्न अस्पतालमा शनिबार भर्ना भएका नुवाकोट बेलकोगढी ११ का युवा राजकुमार लोप्चनको सोमबार बिहान उपचारकै क्रममा अस्पतालमा निधन भएको वडा अध्यक्ष प्रकाशजंग पाण्डेले दैनिकीलाई जानकारी दिए । भदौ १६ गते हस्तकला सीसा उद्योगमा काम गर्ने क्रममा ग्यास लिक भएर आगलागी हुँदा राजकुमार घाइते भएका थिए ।

काठमाडौँको तारकेश्वर नगरपालिकाको वडा नम्बर ८ नयाँपुल नजिकै मधुसुदन पाण्डेले सञ्चालन गरेको हस्कला सीसा उद्योगमा काम गर्ने क्रममा सीताश्री कम्पनीको ग्यास सिलिण्डरको पाइपबाट ग्यास लिक भएर आगलागी भएको थियो । आगलागीमा परी गम्भीर घाइते भएका लोप्चनलाई शनिबार नै कीर्तिपुरस्थित अस्पतालमा पुर्याइएको थियो । शरिरको करिब ७२ प्रतिशत भाग आगोले जलेका राजकुमारको सोमबार चिकित्सकले निधन भएको जानकारी दिएका थिए । राजकुमारको श्रीमति, एक छोरा र एक छोरी रहेका छन ।