आगामी निर्वाचनमा माओवादी बलियो पार्टीको रुपमा स्थापित हुन्छः प्रचण्ड

६ साउन, काठमाडाैं । नेकपा (माओवादी केन्द्र)का अध्यक्ष पुष्प कमल दाहाल प्रचण्डले आगामी निर्वाचनमा माओवादी बलियो पार्टीको रुपमा स्थापित हुने दावी गरेका छन् ।

शुक्रबार पार्टी कार्यालय पेरिसडाँडामा आयोजित पार्टी प्रवेश कार्यक्रममा प्रचण्डले पछिल्लो समय माओवादी नयाँ उत्साहका साथ अघि बढिरहेको भन्दै आगामी निर्वाचनमा बलियो पार्टीको रुपमा स्थापित हुने दावी गरेका हुन् । उनले माओवादी कमजोर भए संघीय लोकतान्त्रिक गणतन्त्र बलियो हुन नसक्ने समेत बताए ।

प्रचण्डले माओवादी क्रान्ति मधेशबाटै सुरु भएको र अहिले मधेशमा माओवादीप्रतिको उत्साह पनि बढ्दै गएको तर्क गरे । उनले माओवादीमा प्रवेश गर्नेलाई आवश्यक जिम्मेवारी दिने भन्दै सवै मिलेर काम गर्नुपर्नेमा जोड दिए ।

कार्यक्रममा जनता समाजवादी पार्टीका केन्द्रीय सदस्यहरु टेकबहादुर शाक्य र वीरेन्द्र प्रसाद यादव लगायत विभिन्न दलबाट आएका नेता तथा कार्यकर्तालाई प्रचण्डले पार्टी प्रवेश गराएका थिए ।