प्रजातन्त्रको ७५ वर्षको अवसरमा ‘सात सालको कथा’ सार्वजनिक

३ फागुन, काठमाडौँ । नेपालमा प्रजातन्त्र आगमनको ७५ वर्षको पूर्वसन्ध्यामा त्यही सन्दर्भ समेटिएको पुस्तक ‘सात सालको कथा’ लोकार्पण गरिएको छ । भारतीय लेखक फणीश्वरनाथ रेणुले हिन्दीमा लेख्नुभएको ‘नेपाली क्रान्ति–कथा’लाई तुलसी भट्टराईको अनुवादमा पब्लिकेसन नेपालयले ‘सात सालको कथा’ का रुपमा बजारमा ल्याएको हो ।

१०४ वर्ष पहिले भारतको बिहारमा जन्मेका लेखक फणीश्वरनाथ रेणु १०४ वर्ष लामो राणाशासन विरुद्धको नेपाली क्रान्तिमा सक्रिय सहभागी भएका हुनुभएको थियो । त्यही आन्दोलनमा सहभागी भएर उहाँले रिपोर्ताज शैलीमा पुस्तक नै लेख्नुभयो । विराटनगरकै राजनीतिशास्त्री तथा रेणु अध्येता भास्कर गौतमले ‘सात सालको कथा’ पुस्तक लोकार्पण गर्दै रेणु यो देश र त्यो देश भनेर नछुट्याउने उदार मानवीय लेखक भएको बताउनुभयो ।

‘रेणुका हरेक सृजनामा मानवता र मुक्त अस्तित्व प्रखर रुपमा आएको हुन्छ,’ गौतमले भन्नुभयो, ‘माथि चुरेदेखि तल गंगासम्मको जनजीवन, प्रकृति र संस्कृतिलाई उनी साझा रुपमा हेर्ने दलीय–देशीय सोचभन्दा माथि उठेका लेखक हुन् ।’

‘सात सालको कथा’ पुस्तकले नेपाली लोकतन्त्रलाई अझ जीवन्त बनाउन भूमिका खेल्ने पनि गौतमले बताउनुभयो । पुस्तकका अनुवादक तुलसी भट्टराईले रेणुको व्यापकता एउटा भाषा वा संस्कृतिको ज्ञानबाट मात्र बुझ्न नसकिने बताउनुभयो । ‘नेपाली क्रान्ति–कथाले स्वतन्त्रता आन्दोलनको सजीव चित्र प्रस्तुत गरेकाले २५ वर्षअघि नै अनुवाद गर्दै छापेको थिएँ,’ अनुवादक भट्टराईले भन्नुभयो, ‘रेणु र बीपी कोइराला दुवै उदार भावनाले लेख्ने लेखक हुन् । यस पुस्तकले प्रजातन्त्र र स्वतन्त्रताको महत्व बढाउँछ ।’

विराटनगरमा कोइराला परिवारमा हुर्केबढेका रेणुलाई बीपी कोइराला आफ्ना भाइ नै ठान्नुहुन्थ्यो । ‘हिन्दीका प्रख्यात साहित्यकार रेणु एकदमै आत्मीय बनेर हामीसँगै विराटनगर आए । हाम्रै घरमा बस्न थाले,’ रेणुको असामयिक निधन भएपछि बीपीले लेख्नुभएको छ, ‘उनी २००७ को क्रान्तिमा होमिए । उनको क्रान्तिकारी प्रवृत्ति एवं अन्याय र दमनको विरोध गर्ने उग्रता मेरै जस्तो थियो । उनी मेरा साना भाइ थिए । साँच्चै उनी मेरै थिए ।’

कोइराला दाजुभाइमध्ये तारिणीप्रसाद कोइरालाका सहपाठी र समवयी रेणुको पुस्तक तारिणी परिवारकै सदस्य इन्दिरा कोइरालालाई हस्तान्तरण गर्दै पुस्तक लोकार्पण गरियो । रेडियो नेपाल स्थापनापूर्व नै विराटनगरमा खुलेको प्रजातन्त्र रेडियोको कथामा रेणु र तारिणीको महत्वपूर्ण योगदान छ, जुन यस पुस्तकमा चित्रित छ ।

धेरै पहिले नै छापिएको पुस्तकको सान्दर्भिकता अझ बढेको भए पनि बजारमा अप्राप्य रहेको महसुस गरेर आफूहरुले अनुवाद पुस्तक प्रकाशन गरेको पब्लिकेसन नेपालयका सम्पादक विमल आचार्यले जानकारी दिनुभयो । ‘बजारमा अप्राप्य तर पढिन आवश्यक छ जस्ता लागेका कृति हामी नेपालय क्लासिक शृंखला अन्तर्गत प्रकाशन गर्छौं’, उहाँले भन्नुभयो, ‘प्रजातन्त्र आगमनको ७५ औँ दिवसको सम्मुखमा विराटनगर जुट मिल, प्रजातन्त्र रेडियोसहित चलेको आन्दोलनको प्रमुख स्थान विराटनगरको इतिहासमा केन्द्रित पुस्तक छाप्न पाउनु हाम्रा लागि गौरवको विषय हो ।’

जीवनभर स्वतन्त्रताको गीत गाउँदै लेखनमा सक्रिय रहेका फणीश्वरनाथ रेणुलाई भारतीय लेखकमध्ये निक्कै नै माथिल्लो श्रेणीमा राखिन्छ । १ सय २० पृष्ठको ‘सात सालको कथा’ पुस्तकको मूल्य ३ सय ४५ रुपैयाँ रहेको छ । पुस्तक देशभरका प्रमुख पुस्तक पसल तथा थुप्रैडटकम www.thuprai.com बाट खरिद गर्न सकिनेछ । विश्वभरका पाठकहरुले पनि अमेजनबाट सोझै पुस्तक खरिद गर्न सक्ने पब्लिकेशन नेपाललयले जनाएको छ ।