कानून निर्माण पहिलो प्राथमिकताः अध्यक्ष तिमिल्सिना
२६ वैशाख, काठमाडाैँ । राष्ट्रियसभाका अध्यक्ष गणेशप्रसाद तिमिल्सिनाले संविधानअनुसार बन्नुपर्ने एकसयभन्दा बढी कानूनको निर्माणमा प्राथमिकताका साथ संसद् जुटिरहेको बताउनुभएको छ । अध्यक्ष तिमिल्सिनाले आज नेपालका लागि जापानका राजदूत मासासी ओगावासँगको शिष्टाचार भेटका क्रममा निर्वाचनपछि नेपाल समृद्धितर्फ उन्मुख भएको र यस अभियानमा मित्रराष्ट्रहरुको सहयोग र साथ प्राप्त हुने विश्वास व्यक्त गर्नुभयो ।
अध्यक्ष तिमिल्सिनाले पछिल्ला वर्षहरुमा नेपालले भूकम्प, संविधान निर्माण र नाकाबन्दीको सामना गरेको बताउँदै त्यस काममा आफ्नो साढे चार वर्षको कार्यकाल सम्पन्न गरी स्वदेश फर्कन लाग्नुभएका राजदूत ओगावामार्फत जापानबाट प्राप्त सहयोगको सराहना गर्नुभयो ।
जापानले पूर्वाधार निर्माण, शिक्षा, स्वास्थ्यलगायतका क्षेत्रमा गरेको सहयोगले नेपाल लाभान्वित भएको पनि उहाँले उल्लेख गर्नुभयो । अध्यक्ष तिमिल्सिनाले दुई देशबीच संसद्मैत्री समूह गठन गरी सांसदको भ्रमण तथा अनुभव आदानप्रदानमा पहल गर्ने विश्वास पनि व्यक्त गर्नुभयो ।
निर्वाचन सम्पन्न गरी संविधान कार्यान्वयनतर्फ लागेकाले नेपालले स्थिरता र समृद्धिको लक्ष्य छिट्टै हासिल गर्ने विश्वास राजदूत ओगावाले व्यक्त गर्नुभएको अध्यक्ष तिमिल्सिनाका सञ्चारविज्ञ अशोक पौडेलले जानकारी दिनुभयो ।
प्रकाशित मिति : २६ बैशाख २०७५, बुधबार १७:३३
