पर्यटनमन्त्रीको अध्यक्षतामा १०१ सदस्यीय महाशिवरात्रि मूल समारोह समिति गठन

२१ माघ, काठमाडौं । संस्कृति, पर्यटन तथा नागरिक उड्डयनमन्त्री योगेशकुमार भट्टराईको अध्यक्षतामा १०१ सदस्यीय महाशिवरात्रि पर्व मूल समारोह समिति गठन गरिएको छ । महाशिवरात्रि पर्व यसपटक फागुन ९ गते परेको छ ।

पशुपति क्षेत्र विकास कोषका कोषाध्यक्ष मिलनकुमार थापाका अनुसार यो वर्षको महाशिवरात्रिका लागि ७५ लाख रुपैयाँ विनियोजन गरिएको छ । योसँगै अहिले नेपाल भ्रमण वर्ष पनि चलिरहेकाले पर्यटक आगमन बढ्ने अपेक्षा गरिएको छ । साथै पर्यटक आकर्षण गर्नका लागि पशुपति क्षेत्रमा भएका विकास निर्माण, मर्मत तथा रङरोगनको काम पनि थालिएको छ ।

यसपटक पनि शिवरात्रिका बेला पाशुपत क्षेत्रमा निःशुल्क स्वास्थ्य हुनेछ । यस्तै यसपटक धुनीका लागि ४५ हजार किलो दाउरा माग भएको छ जसमध्ये आधाभन्दा धेरै पशुपति ल्याइसकिएको छ ।