नाइजेरियामा ११ इसाई बन्धकको घाँटी रेटेर हत्या

१२ पुस, काठमाडौं । जिहादी समूह इस्लामिक स्टेट (आईएस) ले नाइजेरियामा ११ इसाई धर्मावलम्बीको हत्या गरेको देखिने एउटा भिडियो सार्वजनिक गरेको छ । आईएसले त्यसलाई अक्टोबरमा सिरियामा भएको आफ्ना नेता र प्रवक्ता मारिएको घटनाको बदला अभियानको एउटा अंग भएको बताएको छ ।

भिडियोमा देखाइएका पीडितबारे विस्तृत जानकारी दिइएको छैन । आईएसको ‘समाचार संस्था’ अमाकले उत्पादन गरेको ५६ सेकेन्ड लामो भिडियोमा देखाइएका ती सबै पुरुष छन् । आईएसले उनीहरू नाइजेरियाको उत्तरपूर्वी राज्य बोर्नोबाट केही साताअघि नियन्त्रणमा लिइएको जनाएको छ ।

भिडियो डिसेम्बर २६ तारिखमा सार्वजनिक भएको हो । विश्लेषकहरूले स्पष्ट रूपमा क्रिस्मस उत्सवसँग भिडियो सार्वजनिक गर्ने समय मिलाइएको देखिएको बताएका छन् । उक्त भिडियो ठेगाना नखुलाइएको र खुला क्षेत्रमा खिचिएको बीबीसीले समाचारमा जनाएको छ ।

एक बन्धकलाई गोली हानिएको छ भने अन्य १० जनालाई भुइँमा सुताएर उनीहरूको टाउको काटिएको छ । आईएसका पूर्वनेता अबु बकर अल बग्दादी र प्रवक्ता अबुल हसन अल मुहाजिर अक्टोबरको अन्त्यतिर सिरियामा मारिएका थिए ।

करिब २ महिनापछि डिसेम्बर २२ तारिखमा आईएसले उनीहरूको मृत्युको ‘प्रतिशोध’ नयाँ सैन्य अभियान घोषणा गरेको थियो । त्यसयता उसले अभियानको ब्यानरमुनि विभिन्न देशमा आक्रमण तीव्र बनाएको दाबी गरेको छ ।

नाइजेरियाको इस्लामिक समूहको एउटा खेमा बोको हरामले अहिले इस्लामिक स्टेट वेस्ट अफ्रिका प्रोभिन्स (आईएसडब्ल्यूएपी) को ब्यानरमा लडाइँ गरिरहेको छ ।  गत वर्ष आईएसडब्ल्यूएपीले स्वास्थ्यकर्मीको हत्या गरेका थिए । –बीबीसी