काठमाडौँलाई ४५ रनले हराउँदै वुमन च्याम्पियन्स लिग क्रिकेटको उपाधि चितवनले जित्याे
७ कात्तिक, काठमाडौँ । वुमन च्याम्पियन्स लिग क्रिकेटको उपाधि चितवन राइनोजले जितेको छ । बिहीबार भएको फाइनल भिडन्तमा क्याट क्विन काठमाडौँलाई ४५ रनले हराउँदै चितवन च्याम्पियन बनेको हो । त्रिवि क्रिकेट मैदानमा पहिले ब्याटिङ गरेको चितवनले २० ओभरमा ४ विकेट गुमाएर ११२ रन बनायो । काजल र कञ्चन श्रेष्ठले पहिलो विकेटका लागि ४९ रनको साझेदारी गरे । काजल २१ र कञ्चन १९ रनमा आउट भइन् । त्यसपछि सुमन खतिवडाले रित कनोजियासँग ३५ रनको साझेदारी गरिन् । सुमन २९ रनमा आउट भइन्, जतिबेला टिमको स्कोर ८४ रन थियो । थप दुई रन जोड्दा रितु आउट भइन् ।
पाँचौं विकेटका लागि कप्तान इन्दु बर्माले प्यारी चौधरीसँग मिलेर अविजित २६ रनको साझेदारी गर्दै टिमको पारी उकासिन् । इन्दुले इनिङको अन्तिम तीनमा लगातार चौका हान्दै टिमलाई राहत दिएकी थिइन् । ११३ रनको विजयी लक्ष्य लिएर मैदान उत्रिएको काठमाडौँले २० ओभरमा ९ विकेट गुमाएर ६७ रन मात्र बनाउन सक्यो । उसको सुरुवात नै राम्रो हुन सकेन । टिमको स्कोर ९ रन हुँदा शोभा आले आउट भइन् । त्यसपछि लगातार तीन विकेट गुमायो । अप्सरी बेगमले सम्हालिएर खेल्न खोजेकी थिइन् तर १५ रनमा आउट भइन् । ममता थापाले १३ रन बनाइन् ।
प्रकाशित मिति : ७ कार्तिक २०७६, बिहीबार १५:२६
