सूचना बेचेको आरोपमा एआईजी वंशीराज दाहाललाई बर्खास्त गर्न सिफारिस

२३ असोज, काठमाडौं । प्रधानमन्त्री र गृहमन्त्रीको व्यक्तिगत समय तथा गतिविधिसम्बन्धी सूचना चुहावट गरेको आरोपमा निलम्बनमा परेका सशस्त्र प्रहरी बलका अतिरिक्त महानिरीक्षक (एआईजी) वंशीराज दाहाललाई सेवाबाट बर्खास्त गर्न सिफारिस गरिएको छ। सिफारिसअनुसार बर्खास्त भएमा उनी भविष्यमा सरकारी सेवाका लागि समेत अयोग्य हुनेछन्।

गृह मन्त्रालय स्रोतका अनुसार सशस्त्र प्रहरीका अर्का एआईजी अञ्जनीकुमार पोखरेल नेतृत्वको छानबिनपछि दाहाललाई भविष्यमा सरकारी सेवामा नियुक्त हुन अयोग्य हुने गरी बर्खास्त गर्न सिफारिस गरिएको हो। उक्त सिफारिसका आधारमा गृह मन्त्रालयमा बर्खास्तसम्बन्धी आवश्यक कागजात तयार पार्ने काम भइरहेको स्रोतको भनाइ छ।

दाहाललाई बर्खास्त गर्ने अन्तिम निर्णय भने मन्त्रिपरिषद्बाट हुनुपर्ने व्यवस्था छ। उनी गत असोज १९ गते निलम्बनमा परेका थिए।  पूर्वप्रधानन्यायाधीश चोलेन्द्रशमशेर राणासँग पारिवारिक नाता पर्ने दाहालमाथि राणासँग सम्बन्धित प्रकरणमा गोप्य सूचना आदानप्रदान गरेको आरोप लागेको छ। असोज ११ गते राणा बाँसबारीस्थित निवासबाट पक्राउ परेपछि दाहाल उनलाई हिरासतमा भेट्न पुगेका थिए।

सशस्त्र प्रहरी स्रोतका अनुसार राणाको मोबाइल फोनको प्राविधिक परीक्षणका क्रममा दाहालसँग सम्बन्धित सूचनाहरू फेला परेपछि उनीमाथि अनुसन्धान अघि बढाइएको थियो। प्रधानमन्त्री र गृहमन्त्रीहरूको व्यक्तिगत समय तथा गतिविधिबारे निगरानी गरी त्यस्ता सूचना अनधिकृत रूपमा चुहाएको आरोप उनीमाथि छ।

त्यस्तै, विभिन्न मुद्दामा पक्राउ परी हिरासतमा रहेका व्यवसायी दीपक भट्टलाई छुटाउन भएको भनिएको चलखेलमा पनि दाहालको भूमिका रहेको स्रोतको दाबी छ। पूर्वप्रधानन्यायाधीश राणाले भट्टलाई छुटाउन प्रयास गरेको र त्यसमा दाहालले सहयोगी भूमिका निर्वाह गरेको आरोपसमेत छ।

गत वर्ष जेन–जी आन्दोलनपछि विघटित प्रतिनिधिसभाको विघटनलाई असंवैधानिक दाबी गर्दै सर्वोच्च अदालतमा दायर रिट पनि हालसम्म विचाराधीन छ। उक्त रिटलाई आधार बनाएर सरकार परिवर्तनसम्मका गतिविधिमा राणा सक्रिय रहेको र ती गतिविधिमा दाहालले सहयोग गरेको सशस्त्र प्रहरी स्रोतको दाबी छ।

दाहालमाथि लागेका आरोप, छानबिनको निष्कर्ष र बर्खास्त सिफारिससम्बन्धी विषयमा गृह मन्त्रालय तथा सम्बन्धित निकायको औपचारिक निर्णयबाट थप विवरण स्पष्ट हुनेछन्।