जीवन बीमा कम्पनीको कमिसन खर्च १० प्रतिशतले बढ्यो, कुनबाट कति ?

३१ साउन, काठमाडौं । नेपालमा सञ्चालनमा रहेका जीवन बीमा कम्पनीहरूको कमिसन खर्च एक वर्षमा १० प्रतिशतभन्दा बढीले वृद्धि भएको छ। आर्थिक वर्ष २०८२/८३ मा १४ जीवन बीमा कम्पनीले कमिसनमा कुल १६ अर्ब ३० करोड ३९ लाख रुपैयाँ खर्च गरेका छन्। अघिल्लो आर्थिक वर्षमा यस्तो खर्च १४ अर्ब ८० करोड ७० लाख रुपैयाँ रहेको थियो।

एक वर्षको अवधिमा बीमा कम्पनीहरूको कमिसन खर्च १ अर्ब ४९ करोड ६९ लाख रुपैयाँले बढेको हो। यो वृद्धि १०.११ प्रतिशत हो। कमिसन खर्चका आधारमा नेपाल लाइफ इन्स्योरेन्स सबैभन्दा अगाडि देखिएको छ। कम्पनीले आर्थिक वर्ष २०८२/८३ मा कमिसनका लागि ४ अर्ब १२ करोड ४९ लाख ५९ हजार रुपैयाँ खर्च गरेको छ। अघिल्लो वर्ष कम्पनीको कमिसन खर्च ३ अर्ब ६६ करोड ६८ लाख ५२ हजार रुपैयाँ थियो। नेपाल लाइफको कमिसन खर्च एक वर्षमा १२.४९ प्रतिशतले बढेको छ।

त्यस्तै, नेसनल लाइफ इन्स्योरेन्सले २ अर्ब २६ करोड ९९ लाख ८७ हजार रुपैयाँ कमिसन खर्च गरेको छ। कम्पनीको खर्च अघिल्लो वर्षको तुलनामा ३.९३ प्रतिशतले बढेको हो।

लाइफ इन्स्योरेन्स कर्पोरेसन (एलआईसी नेपाल) ले अघिल्लो वर्ष १ अर्ब ४७ करोड ७४ लाख रुपैयाँ खर्च गरेकोमा समीक्षा अवधिमा ३.२७ प्रतिशतले बढेर १ अर्ब ५२ करोड ५७ लाख रुपैयाँ पुगेको छ।

समीक्षा अवधिमा हिमालयन लाइफले १ अर्ब ५२ करोड ४३ लाख रुपैयाँ अभिकर्ता कमिसनमा खर्च गरेको छ। अघिल्लो वर्ष कम्पनीले १ अर्ब ४६ करोड २९ लाख रुपैयाँ अभिकर्ता कमिसन वितरण गरेको थियो। अघिल्लो वर्षको तुलनामा समीक्षा अवधिमा कम्पनीको यस्तो खर्च ४.२० प्रतिशतले बढेको छ।

गत आर्थिक वर्षमा अभिकर्ता कमिसनमा सूर्यज्योति लाइफले १ अर्ब १३ करोड ८८ लाख रुपैयाँ, एसियन लाइफले ८८ करोड ११ लाख रुपैयाँ, सिटिजन लाइफले ८५ करोड ४० लाख रुपैयाँ, सानिमा रिलायन्स लाइफले ८२ करोड ६ लाख रुपैयाँ र आइएमई लाइफले ६७ करोड ३ लाख रुपैयाँ खर्च गरेका छन्।

यसैगरी गत आर्थिक वर्षमा अभिकर्ता कमिसनबापत रिलायबल नेपाल लाइफले ६२ करोड ४९ लाख रुपैयाँ, प्रभु महालक्ष्मी लाइफले ६० करोड ३८ लाख रुपैयाँ, मेटलाइफले ५८ करोड ७५ लाख रुपैयाँ, सन नेपाल लाइफले ४६ करोड ७६ लाख रुपैयाँ र राष्ट्रिय जीवन बीमा कम्पनीले २० करोड ९८ लाख रुपैयाँ खर्च गरेका छन्।

कमिसन खर्चमा भएको यो वृद्धिले जीवन बीमा कम्पनीहरूको व्यवसाय विस्तार, नयाँ व्यवसायमा भएको वृद्धि तथा अभिकर्ता/वितरण सञ्जालमा हुने खर्चको आकार बढिरहेको संकेत गर्छ। कुल खर्चमा नेपाल लाइफको हिस्सा भने अन्य कम्पनीको तुलनामा निकै ठूलो देखिएको छ।