प्रिमियम मूल्यमा आईपीओ निष्काशनको तयारीमा बाजेको सेकुवा

१९ असार, काठमाडौं । नेपालकै चर्चित रेष्टुरेन्ट ब्रान्ड बाजेको सेकुवा लिमिटेडले प्रिमियम मूल्यमा प्रारम्भिक सार्वजनिक निष्कासन (आईपीओ) जारी गर्ने तयारी गरेको छ । कम्पनीले सर्वसाधारणका लागि २० प्रतिशत सेयर आईपीओमार्फत निष्कासन गर्ने प्रस्ताव अघि सारेको छ भने संस्थापक सेयरधनीतर्फ पनि प्रिमियम मूल्यमा आईपीओ जारी गर्ने विषयमा छलफल भइरहेको जनाएको छ ।

आईपीओ निष्कासनसम्बन्धी प्रस्ताव पारित गर्न कम्पनीले साउन १ गते विशेष साधारण सभा बोलाएको छ । काठमाडौंको बत्तीसपुतलीस्थित रजिष्टर्ड कार्यालयमा बिहान ११ बजे सभा हुने कम्पनीले जनाएको छ । सभाबाट आईपीओसम्बन्धी सम्पूर्ण अधिकार सञ्चालक समितिलाई प्रदान गर्ने एजेन्डा समेत रहेको छ ।

यसअघि गत असोज २ गते सम्पन्न वार्षिक साधारण सभाले आईपीओ सम्बन्धी प्रस्ताव पारित गरिसकेको थियो । कम्पनीले आवश्यक प्रक्रिया अघि बढाउँदै क्रेडिट रेटिङसमेत गराइसकेको छ, जसअनुसार केयर रेटिङ नेपालले कम्पनीलाई मध्यम स्तरको सुरक्षित मानिने केयर एनपी त्रिपल बी इस्यूअर रेटिङ प्रदान गरेको छ ।

कम्पनीको अधिकृत पूँजी १ अर्ब रुपैयाँ र जारी पूँजी ७५ करोड रुपैयाँ रहेको छ । संस्थापकतर्फ ६० करोड रुपैयाँ चुक्ता पूँजी कायम भएको कम्पनीले सर्वसाधारणका लागि १५ करोड रुपैयाँ बराबरको सेयर निष्कासन गर्ने तयारी गरेको छ ।